A Viaxe, que enarbora a bandeira da cociña de matices fermentada á sombra da gastronomía peruana, é un local construído desde o esforzo, o talento e unha visión alegre do mundo das casas de comidas. O percorrido pola oferta que fai aos seus comensais permite descubrir os encantos dos produtos de Galicia sometidos aos procesos que implican as receitas de diversas influencias, que van desde as variedades andinas aos sincretismos asiáticos. O resultado cativou a un público novo, que busca renovados territorios gastronómicos aos que pode acceder desde o menú diario ou a comida á carta. As papas arrugás cultivadas na terra galega ou os ceviches das rías están presentes nunha oferta na que tamén destaca o hummus con escalibada de verduras de tempada, as lentellas escabechadas, a entraña de tenreira anticuchera ou o ají de pito campeiro. Ás fortalezas destes pratos hai que engadir tres prostres moi logrados: a torta de tres leites, o choco lúcuma e o suspiro-alfajor-yogourt. O artífice desta proposta gastronómica é Tomás Rubio , empeñado na renovación constante da gastronomía. A súa paixón polas raíces culinarias combínaa cos seus coñecementos da gastronomía máis innovadora, o que deu como resultado propostas que atopan moi boa aceptación. E, aínda por riba, o equipo do que se rodeou, reforza a calidade gastronómica e humana.
Prato estrela
Adobo arequipeño
A base é un anaco de touciño entrefebrado de porco galego e o adobo con especias. A pancela ponse en auga e sal durante 8 horas. Prepárase un aderezo con cervexa, viño branco, cebola, allo e ají panca. Logo cócese a baixa temperatura (65 graos) durante 24 horas. O seguinte paso consiste nun marcado en tixola. Sérvese cunha salsa de verdura co adobo, e uns allos porros con cenoria confitada.
Prezo medio
De 14 a 30 euros.