Anxo Balado, promotor de eventos hostaleiros: «O futuro pasa por sacudirse o medo e Galicia pode facelo»

Son tempos de reflexión para persoas como Anxo Balado (A Coruña, 1971). Xerente de Da Vinci empresa especializada en formación e realización de eventos no sector de hostalería , creador e promotor de Distilled Show e GaliGastro (Galicia Gastronómica) e fundador da Asociación Lume Atlántico en defensa da Dieta Atlántica e a vida saudable avalada cientificamente, a súa análise do sector hostaleiro dá para máis dun debate.

-Será isto un punto de inflexión?

-Indubidablemente. Nunca soubemos o verdadeiro significado dunha pandemia. Ata agora. Cando chegue outubro e as súas doenzas, volveranos condicionar. Mirando á fronte, Galicia atópase ante unha oportunidade histórica para colocarse na primeira liña do turismo nacional. Iso si, necesitamos profesionais excelentes. Pero tamén unha reeducación do cliente, cuxa necesidade quedou patente o primeiro día de apertura das terrazas.

-Como afectará aos diferentes tipos de hostalería?

-Nun restaurante, coa contorna controlada, afectará menos. É cuestión de confianza. Xa no lecer nocturno de pé, o distanciamento social é máis complicado, porque se basea na socialización entre todos os asistentes. O futuro da hostalería pasa por ser capaz de transmitir ao cidadán a confianza necesaria de que o seu espazo é seguro, saudable e cómodo. Que se sacuda o medo. Saúde e ciencia deben traballar da man: capacidades e investigación son dúas claves.

-As reservas para beber seguirán?

-Agora vémolas en todo tipo de establecementos, aínda que creo que só está suxeito ao momento actual. Tomar un café ou unha cana é case sempre un acto impulsivo, non programado.

-Como cambiarán os eventos?

-Pois os de gran calado talvez se vexan máis afectados, pola súa complexidade. Necesitan moito tempo desde que se idean ata que se realizan e se despois de traballar durante dous anos, no que non tes ingresos pero si moitos gastos, a poucas semanas obríganche a suspendelo, as perdas son descomunais. É por iso que nesta nova situación creo este tipo de eventos teranos que organizar empresas cun gran arraigamento na rexión en que se celebren, dado que coñecen moito mellor a súa conxuntura e poderán deste xeito minimizar os riscos. E neste particular é obvio que Galicia ten entre as súas contas pendentes o crear o seu gran evento gastronómico. O Xacobeo 2021 debe de ser o noso ano.

-E os que son ao aire libre?

-Os foodtrucks e casetas gastronómicas poden ser moi interesantes neste momento, pero están totalmente suxeitas á estacionalidade. Aínda que apoio a súa celebración, é importante que sexan explotadas na súa maioría por hostaleiros desa poboación, para unha maior implicación e menor percepción de intrusismo. Fagamos novas apostas, pero tamén coidemos e respectemos ao que ten o seu negocio todo o ano nesa localidade e xera riqueza a través do pagamento continuado dos seus impostos. Esa é unha das cousas nas que os organizadores de eventos deste tipo debemos mellorar.

-Altérase a relación cociña-sala?

-A sala debe dar un paso adiante, profesionalizarse, ser proactiva, ofrecer unha imaxe forte do local, con control e seguridade, extremando os protocolos mentres ofrece unha gran dose de empatía co cliente. Para mirar ao futuro teremos buscar pistas no pasado. As cociñas deben insistir no produto, adaptarse e ser versátiles e transmitir que as súas elaboracións son gastronomía saudable.

-Foi esaxerada a percepción de que o que máis se botaba de menos era a hostalería?

-Non o creo. Somos unha sociedade latina, a vida é na rúa, vivímola desde nenos. É un lecer moito máis frecuente que todo o demais. Non é de primeira necesidade, pero si de necesidade psicolóxica.

-Quedaron patentes as carencias tecnolóxicas?

-Tampouco. Non se demandaba ata agora e a actividade desenvolvíase con certo éxito, o que non quita que haxa aspectos por mellorar. A formación cada vez é mellor, aínda que a sala non pode quedar atrás e debe seguir os pasos que deu no seu momento a cociña.

-Como será o futuro?

-A crise golpeará moi forte. Reduciranse os negocios e os que queden, deben ser mellores. Hai que coidar o capital humano, é un dos alicerces. Non todo é sol e praia. Galicia é o exemplo.

---

---

---