Gran Hermano na pescadería
A compra de peixe evolucionou, revolta dixital mediante, ata o punto de que xa é posible adquirir todo tipo de pezas frescas vía wasap ou videollamada. Podemos fiarnos? Si, se segues os seguintes consellos
Rosa e Chelito. Óscar e Ana. Pescadería As Nenas. Estes tres postos de peixe da praza de Lugo da Coruña, e outros tantos, apuntáronse á tendencia de vender os seus frescos por Internet. A pesar da reticencia dalgúns clientes a comprar produtos tan delicados como o peixe a través dunha pantalla, o certo é que hai xeitos de garantirse o éxito sen moverse do sofá. WhatsApp ou videollamada para facer a compra no mercado? O futuro era isto.
A empresa Kibus ofrece un servizo de compra on-line e repartición de boa parte dos produtos que se venden nesta céntrico mercado. A propósito de que facer a compra en prazas de abastos, a pesar da calidade da oferta, é un pracer que poucos poden permitirse no día a día, esta compaña quere achegarche a casa a cesta da mellor compra. Sen trampa nin cartón. Para iso está Pedro Quián, asesor gastronómico e comprador en Kibus, que a través dunha videollamada ou unha mensaxe de wasap elíxeche as mellores pezas: da lonxa á praza de Lugo e de aí, á túa casa, todo, lembra este experto «sen que rompa a cadea de frío». É sinxelo. O cliente debe escoller, a través da web de Kibus, o posto que lle interesa. E a partir de aí, se un desexa unha compra personalizada, Quián entra en acción mostrándolle ao usuario a ampla variedade do posto seleccionado.
Este especialista mantén que o seu traballo é garantirlle ao comprador a peza sobresaliente. Para iso, explica, é imprescindible atender ao brillo da pel do peixe; ao ollo, «que pareza que está vivo», di; á dureza da pel, que estea tersa; e ás agallas, «que deben estar ben vermellas», sentenza Quián. Engade que é importante tamén ter en conta que os peixes pequenos, como as xoubas, non aguantan frescos máis dun día. Con todo, os peixes grandes, poden manterse en boas condicións ata 48 horas.
Doutra banda, a todos aqueles amantes do peixe, e confirma que en Galicia a maioría sono, Quián lémbralles que están de parabén. «Estamos a entrar nos meses con erre, así que volven raias, abadexos ou pintos á cociña e, con eles, as caldeiradas. Pero isto non é todo, peixes grandes como a robaliza ou o ollomol estarán a partir de outubro no mellor momento porque acadan o seu nivel de graxa óptimo». Perfectos para preparar ás costas, calquera pode reservalos sen moverse de casa grazas a ese Gran Hermano que, agora, tamén é a pescadería. Aínda que, recoñecen desde Kibus, de momento os seus principais clientes son mozos traballadores e mulleres xubiladas.
