Gerardo Quintela, chef do Arallo: «Somos moi pouco tolerantes co picante»
SABE BEN
O cociñeiro aposta no seu local por un sistema sen reservas que considera «cómodo»
06 sep 2019 . Actualizado ás 11:46 h.Non ten reparo en recoñecer que un restaurante das características de Arallo subsiste, nunha cidade como A Coruña, en boa medida grazas a Inditex . Non acepta reservas e o pequeno local conta tan só cunha barra que permite o contacto directo entre o comensal e o persoal de cociña que, neste caso, lidera o lenguaraz Gerardo Quintela (1983, A Coruña). A quen tampouco lle incomoda demasiado advertir que neste negocio do Grupo Amicalia, que ten a súa réplica en Madrid, «quen queira saír cheo para comer carne vaise sentir decepcionado». Pero, polas colas que ven as fins de semana en María Pita, son poucos os defraudados e, moitos, os que repiten. Sobre todo, para volver comer os seus icónicas croquetas ou o prato de tuétano.
-Sentaron un precedente na cidade con iso de que o restaurante vire ao redor dunha gran barra?
-Este tipo de restaurante sabiamos que ía funcionar pola xente de Inditex, pero foi unha sorpresa chegar a xente maior, que vén, interésalle probar cousas novas e son bos clientes. Está claro que esta idea funciona porque che permite descubrir practicamente toda a carta por un menor custo, e na Coruña xa hai dous ou tres sitios que funcionan como nós.
-Di que ata hai pouco nas sobremesas non saïamos da torta da avoa e o arroz con leite, pero agora a maioría pode pedir en Arallo unha «panna cotta thai» sen ter que preguntarlle a Google de que se trata.
-É que agora todo o mundo sae a cear e sabe de cociña, e ademais interésalle ter novos coñecementos. Iso si, hai sabores que aínda se nos resisten. Co picante, por exemplo, somos moi pouco tolerantes; hai algúns clientes que se volven tolos. Tamén temos prexuízos. Por iso cando non dicimos de que é un guiso de tendóns ninguén se queixa, pero cando comentamos o nome... bota para atrás.
-Prexudícalles ou lles beneficia o sistema «sen reservas»?
-Non o sei, pero eu creo que é moi cómodo este sistema. É verdade que tes que agardar dez minutos ou media hora, pero, doutra banda, se tes antollo para cear aquí asegúrasche un sitio. Os que non lla queren xogar veñen ás 20.30 horas.
-Algunha novidade que teña prevista na carta e póidanos contar?
-Agora estamos co atún vermello a lume de biqueira e facendo a carta máis galega, porque Arallo Coruña ten que tirar máis a Galicia. Non podes meter o mesmo que en Madrid. Estamos probando moitas algas para incluír, e veremos...
-Por que non lle gustan plataformas como TripAdvisor?
-Non me interesan. Quen veña pensando en comer, xenial. Pero quen queira criticar, mellor que quede en casa. O 80 % dos comentarios son cero obxectivos, por iso non son partidario desas valoracións.
máis entrevistas a chefs
