Cancelacións e reservas de última hora, posibles consecuencias das eleccións no turismo galego
GALICIA
O sector ve con incerteza os comicios en plena ponte do Apóstolo
31 may 2023 . Actualizado ás 05:00 h.Non será a primeira vez que os galegos acudan ás urnas no verán. Pero naquelas eleccións autonómicas do 12 de xullo do 2020, o covid aínda campaba e obrigaba a importantes restricións, afectando moi negativamente á hostalería e ao turismo. Agora, con todo, as ganas de saír e viaxar cotizan á alza, e o sector turístico galego vive tempos de bonanza, no que a número de viaxeiros se refire. De aí a incerteza coa que se vive a sorpresiva convocatoria de eleccións xerais, en pleno período vacacional, e coincidindo cun das pontes máis importantes do ano: o que se pode formar unindo a fin# de semana electoral co festivo do 25 de xullo, Día de Galicia e do Apóstolo.
«É moi mala data para o sector, vai prexudicar moito. Rompe a ponte, e é máis difícil que a xente se decida a moverse, porque xa non lle darán os días», vaticina César Sánchez-Ballesteros, presidente da Federación de Hostalería de Pontevedra. «Si que vai afectar, eu xa o notei nesta fin de semana coas eleccións municipais. Só tiven estranxeiros no albergue. E vai coincidir xusto en datas das grandes, nas que o Camiño adoita estar a tope», opina tamén Borja Rodríguez, vicepresidente da Asociación Galega de Albergues Privados. «As cancelacións chegarán, son inevitables», advirten tanto Rodríguez como Sánchez-Ballesteros.
Con todo, non todos o ven tan negativo. «Non agardamos que a repercusión da convocatoria de eleccións sexa significativa en termos de cancelacións ou cambios», din desde o Clúster Turismo de Galicia.
«Honestamente, creo que non vai afectar, hai moitas opcións, como votar por correo, e a xente ten ganas de vacacións logo de todo un ano traballando e vai arriscar. O que si vai haber é máis reservas de última hora, pero xa é algo ao que estamos acostumados», apunta Dulcinea Aguín, presidenta de Aviturga, a asociación que agrupa ás vivendas de uso turístico galegas. «Simplemente a xente terá unha escusa máis para cancelar a última hora, pode causar pequenos desaxustes, pero non é a fin do mundo», estima Francisco Almuíña, da Federación Galega de Turismo Rural.
Esas cancelacións de última hora, xunto coas reservas feitas no último momento, son tamén as posibles consecuencias que destaca Jesús Picallo, xerente de varios hoteis na Costa da Morte, xa que aínda que o voto por correo poida «minimizar» os prexuízos da data elixida, as persoas obrigadas a participar nas mesas electorais non se saberán ata finais do mes de xuño. «Pode ser que a xente agarde a ver se lle toca, e reserve a última hora, ou cancele o que xa ten. Isto vainos dar problemas de organización e xestión. En todo caso, a data elixida non é unha boa noticia, creo que non se pensou ben cómo podía afectar ao sector turístico», apunta Picallo.
A necesidade de non afastarse demasiado do lugar de residencia, apuntan algúns actores, abre a posibilidade de que nesa ponte o turismo de proximidade substitúa ao que, doutro xeito, viría doutras comunidades. «Non é a data idónea, porque está no corazón do verán, pero non sei se afectará á hostelería. Se cadra se a xente ten que quedar na casa, ou volver por uns días das súas vacacións, aproveita máis para ir comer ou cear fóra», aventura Cheché Real, representante dos hostaleiros de Lugo.
A preocupación é maior entre os turoperadores. «Os grandes problemas son para os que traballamos paquetes completos, con voos incluídos, porque aí non se poden facer cambios facilmente. Moitos dos que teñen xa reservas, vanas cancelar, e os que non as teñen, non van reservar para esas datas. Isto vai provocar cancelacións e vainos a complicar moito o mes de xullo», sinala Lidia Vidal, de CNTravel. E advirte: «Pero a xente vai viaxar igualmente. O que pasa é que van coller o que quede a través de Internet. Os almacenistas e as axencias imos ser os máis afectados».
Desde a Asociación Galega de Axencias de Viaxes (Agavi), con todo, agardan que non haxa tanta repercusión. «O tema de ter que ir á mesa electoral está cuberto pola maioría dos seguros de viaxe. Pode que isto ralentice un pouco as reservas, pero agardo que non vaia máis alá», di o presidente da asociación, Juan Rivadulla.
Desde a Mesa do Turismo, unha asociación estatal de empresas, creen que a celebración das eleccións xerais afectará os plans dos viaxeiros nacionais, pero que non afectará á chegada de turistas internacionais.