As chamas regresan á zona de Valdeorras, e afectan tamén aos concellos das Pontes, Chandrexa de Queixa, O Irixo e Laza. Este último arrasou 740 hectáreas e provocou a suspensión dos trens entre Ourense e Santiago
17 ago 2022 . Actualizado ás 14:53 h.O lume non dá tregua en Galicia. Tras a extinción onte do incendio de Caldas de Reis, na noite do martes iniciábanse cinco novos na comunidade, dúas na provincia da Coruña e tres na de Ourense.
Un dos máis importantes é o de Carballeda de Valdeorras, concello no que arderon o mes pasado máis de 12.000 hectáreas nos que foron os maiores incendios da historia de Galicia. Nesta ocasión, o lume iniciouse onte pola tarde, xa queimou 440 hectáreas e o vento está complicando os labores de extinción.
Medio Rural solicitou ademais o nivel dous de urxencia no incendio que comezou este martes no concello ourensán de Laza, como medida preventiva dada a súa proximidade á aldea de Taboazas, no concello limítrofe de Chandrexa de Queixa. Dá a casualidade de que este último municipio tamén loita contra outro lume, que se iniciou na tarde de onte na parroquia de Queixa. Está sendo unha xornada complicada na provincia de Ourense que, este mércores suma un novo incendio no concello do Irixo. Iniciouse na parroquia de San Cosmede de Cusanca e tamén afecta o municipio limítrofe de Dozón, xa na provincia de Pontevedra. Arrasou 240 hectáreas e provocou a suspensión dos trens entre Ourense e Santiago
Paralelamente, hai equipos de extinción traballando aínda no incendio de Verín que se orixinou hai xa unha semana e que queimou 600 hectáreas, a pesar do despregamento de medios que chegou a mobilizar, entre outros medios a 11 brigadas, 57 motobombas, unha vintena de medios aéreos e de recibir o apoio tanto da UME como de equipos de Portugal. Aínda que a súa situación oficial é a de que o lume está controlado, non se baixa a garda.
Controlado está tamén o único incendio contra o que seguen loitando os equipos de extinción na provincia de Pontevedra: o de Ponte Caldelas, que comezou o venres pola tarde e calcinou 380 hectáreas.
Na provincia da Coruña declarábase o martes, ao redor das oito e vinte da tarde, un novo incendio nas Pontes, que destruíu 105 hectáreas. Esta mediodía dábase por estabilizado e xa se solicitou a desactivación do nivel 2 de alerta, que se decretaba onte pola súa proximidade co núcleo de Cuíña. Nese mesmo concello, a parroquia de Vilavella, iniciábase outro ás once danoite , que queimou 60 hectáreas, aínda que pouco despois das sete da mañá estaba estabilizado. Tamén está estabilizado o de Boiro , que é o que máis superficie arrasou nesta segunda vaga de incendios en Galicia, con 2.200.
Ante esta situación, desde a Xunta lembran que, para alertar de lumes forestais e actividades incendiarias, existen os teléfonos 085 e 900 815 085. Este último, segundo indicaba onte o conselleiro de Medio Rural, José González, recibiu o mes pasado 120 chamadas e algunhas delas están «abrindo liñas de investigación».
No resto de España tamén sofre os efectos das chamas. En León , o de Boca de Huérgano calcinou xa 900 hectáreas e conta cun perímetro aproximado de 20 quilómetros. Sete son os que arden neste momento en Asturias , dos que seis están controlados e outro estabilizados. Á primeira hora desta mañá declarábase un novo incendio en Xirona despois de que un vehículo ardese na AP-7, que obrigaba a cortar unha liña de AVE , aínda que ao mediodía xa se daba por estabilizado.