Os municipios buscan aínda persoas con titulación para vixiar as praias
02 jul 2022 . Actualizado ás 05:00 h.Os mil quilómetros de costa que ten Galicia estarán atendidos por uns 500 socorristas durante o verán, moitos menos dos desexados. Moitos concellos non contan con candidatos pola suma de dous factores: a estacionalidade do traballo, que limita o interese dos interesados; e os requisitos formativos, un curso dunhas 400 horas, o que implica un diñeiro e tempo que non se recuperan co soldo nas praias.
Este é un percorrido pola costa cando xa comezou a tempada:
Un socorrista por cada 2,5 quilómetros. A costa de Lugo comeza o verán con 44 socorristas para os seus 114 quilómetros. Hai casos graves, como o de Barreiros , sen ningún servizo de socorro no seu litoral, de oito quilómetros; palíase a súa ausencia cunha lancha que percorrerá a costa.
A situación é grave no Vicedo, que só puido contratar a dúas (necesita 8); Cervo deixa a praia de Cubelas sen cobertura catro horas a pesar de ter 5 socorristas; Foz conseguiu a dez, catro vanse a Burela e seis a Viveiro .
Ferrolterra
Servizo decimado. A procura de socorristas converteuse en misión imposible para os distintos concellos de Ferrolterra. En Valdoviño só lograron cubrir 9 das 33 prazas ofertadas, quedando limitado o servizo aos areais da Frouxeira e Pantín. O rexedor, Alberto González, destacou que manterán aberto o proceso para poder incorporar profesionais ao longo da tempada estival e traballa, ademais, na procura de dous patróns para o manexo de embarcacións de salvamento e rescate.
No caso da cidade de Ferrol, a situación é similar. A convocatoria para a incorporación de 60 persoas pechouse coa contratación de 46 profesionais. Desde o concello hase aprobado a publicación dunha nova oferta, financiada cunha subvención da Consellería de Emprego e Igualdade, para tratar de ampliar o capital humano para as praias de Penencia, Doniños, San Xurxo, Esmelle, A Fragata, Santa Comba, Ponzos, Caranza e A Graña.
A Coruña
Moi axustados. Os municipios grandes son os únicos da comarca da Coruña con vixilancia suficiente: 38 en Arteixo ; na Coruña, cun programa que funciona desde o 15 de xuño ao 15 de setembro, conta con 32 (dúas máis que o ano pasado); e Oleiros, 25. En Sada teñen 6 peros agardan sumar outros 5: Bergondo conta con dispor de 11 pero só asinaron 8; e en Miño están máis ou menos igual, con 10 inscritos e a previsión de 4 máis.
Á espera de mellorar. Á espera de que se cubran prazas pendentes, hai 62 repartidos en nove municipios. Carballo conta con 26, aínda que agarda chegar a completar 32 prazas e xa abriu concurso para contratar a cinco máis. En Caión (A Laracha), haberá sete. En Fisterra , por agora só hai 1, na Langosteira, igual que na praia de Estorde (Cee) ou en Muxía . Nestes tres concellos pediron máis, pero a falta de profesionais obrígalles a conformarse. En Corcubión non atoparon nin un só, mentres que en Camariñas hai 4 nas praias de Arou, Ariño e Lingunde. Catro tamén hai en Laxe , onde agardan que a próxima semana se incorpore outro.
En Malpica xa levan unha semana funcionando con seis e no Ézaro (Dumbría) traballan tres, aínda que pediran catro prazas. En Ponteceso teñen a tres en Balarés , dous en Osmo, dous en Hermida e un en Niñións; todos contratados a través dunha empresa particular, porque non conseguiron a ninguén a través do programa da Xunta.
Barbanza
Un terzo menos do necesario. Dos nove concellos costeiros de Barbanza, cinco teñen socorristas, aínda que ningún completou as prazas. Eran 90 en total e hai, por agora, 36 persoas. Varios concellos farán unha segunda convocatoria.
Arrincan con vixilancia nas praias de en Lombiña e Cabío, na Pobra; Boiro, en Barraña e Carragueiros; Muros, en San Francisco. O luns haberá servizo en Boca do Río, en Carnota , e ao longo da próxima semana, nas praias de Coroso, O Vilar e Ladeira, en Ribeira . Este último é o municipio que máis candidatos conseguiu. Concorreron 20 persoas ao proceso, que segue aberto porque 8 están provisionalmente excluídas á espera de que completen documentación requirida.
Arousa
Moitas carencias. En A Illa de Arousa só teñen 2 dos 6 socorristas que necesitan; O Grove require de 17 persoas, pero non as atopou e polo momento só cobre a atención na Lanzada; en Vilagarcía acadaron os 12 que agardaban e que cobren Compostela, Campanario e Preguntoiro.
Pontevedra
Ningún candidato en Ponte Caldelas. En Pontevedra e a súa contorna hai vixiantes en 22 praias: 17 en Sanxenxo , 1 en Poio e 4 en Marín , aínda que neste concello necesitan un para O Santo. En Bueu faltan 5 e en Ponte Caldelas, que ten unha praia fluvial na Calzada, non houbo nin sequera aspirantes.
Vigo
Obxectivo cumprido. En Vigo hai desde o día 15 de xuño 76 socorristas e en Cangas apuran a contratación dos 24 necesarios; no Val Miñor (Nigrán e Baiona) teñen 23; en Redondela e Moaña conseguiron cubrir as súas prazas (12 e 6) e só queda A Guarda, que busca 6.
O secretario xeral do PSdeG, Valentín González Formoso, instou onte á Xunta a rectificar para evitar que a insuficiencia de socorristas en «moitas praias de Galicia» provoque «un problema de seguridade para os bañistas». «Non hai outro territorio do Estado no que ocorra isto», lamentouse.
Con información de Ana Gerpe, Toni Silva, Elba da Barreira, Rosa Estévez, Marcos Gago, Antón Lestón, Mónica Torres e Ramón González.