O decreto que regulará as familias monoparentais en Galicia sairá a consulta pública en febreiro
GALICIA
Fabiola García avanza no Parlamento que permitirá crear un rexistro de casos e desenvolver un plan de apoio adaptado ás súas necesidades
26 ene 2022 . Actualizado ás 20:03 h.O Goberno galego sacará a consulta pública no mes de febreiro o decreto que acreditará a condición de familia monoparental. A conselleira de Política Social anunciouno este mércores no Parlamento por mor dunha pregunta oral no pleno da deputada nacionalista Noa Presas, que acusou a Xunta na súa formulación de dilatar durante anos esta regulación e alertou da situación dunhas cen mil persoas -cifrou-, moitas delas en risco de exclusión social. Fabiola García sinalou que, precisamente, este decreto servirá para concretar o número de casos nun rexistro, crear un plan de apoio específico e para revisar o concepto de familia monoparental, recoñecendo a súa «especial consideración», cumprindo co establecido na Lei de impulso demográfico.
O decreto será «un paso de xigante para moitos fogares» que pronto poderá ser enriquecido con propostas por parte da sociedade galega, sostivo a conselleira, que tamén lembrou algúns dos beneficios cos que xa contan este tipo de familias, como a prioridade de acceso nas escolas infantís, as casas neno e os centros educativos; os descontos do 50 % nos campamentos da Xunta; e as taxas reducidas en residencias de tempo libre, así como beneficios fiscais.