Son 32 máis que o curso pasado, e son maioría os que están matriculados en Educación Infantil ou Primaria
06 dic 2021 . Actualizado ás 16:54 h.O número de alumnos que estudan galego nos territorios de Castela e León limítrofes con Galicia aumentou este curso ata os 1.115. Son 32 máis que o ano pasado. As cifras haas confirmado o secretario xeral de Política Lingüística, Valentín García, na reunión anual de seguimento do programa de promoción da lingua galega no Bierzo e Sanabria, asinado polos gobernos galego e castellanoleonés hai 20 anos.
Dos 1.115 estudantes que aprenden galego nalgún dos 19 centros adscritos ao programa, 933 están matriculados en Educación Infantil ou Primaria; 137 proceden de institutos, e 45 da escola oficial de idiomas de Ponferrada.
A implantación do ensino do galego en Castela e León ten carácter voluntario, pero os dous gobernos autonómicos intentan promover que os centros ofrezan unha continuidade neste programa de formación, para garantir que os alumnos que o cursen poidan completar os seus estudos e obter os certificados oficiais correspondentes. Por exemplo, os estudantes que finalicen os estudos de ESO cursando as correspondentes materias en galego poden obter o nivel Celga 2, mentres que os de Bacharelato optan ao Celga 3.