Os pisos turísticos galegos tiveron unha ocupación do 85 % en xullo e auguran un agosto «extraordinario»
GALICIA
As cidades recuperan porcentaxes prepandemia, segundo Aviturga
03 ago 2021 . Actualizado ás 14:53 h.A media de ocupación nas vivendas de uso turístico (VUT) de Galicia superou en xullo o 85 %, segundo datos proporcionados por Aviturga, a asociación que representa aos propietarios destes aloxamentos na comunidade. A cifra está moi por amais da de hai un ano, cando se quedou no 68 %.
Por provincias, a mellor ocupación media foi a de Pontevedra, cun 87,5 %. Na da Coruña houbo un 85 %, e as de Ourense e Lugo tiveron un 83 %. En canto aos datos por municipios, Sanxenxo volveu encabezar o ránking (é ademais o concello con máis pisos turísticos rexistrados) cunha ocupación do 88 %. Outros destinos potentes da costa pontevedresa como Cangas, Marín, O Grove, Poio, Bueu, Nigrán, A Illa ou Baiona quedaron en torno ao 85-86 %, e puntos do interior como Campolameiro, A Estrada, Silleda ou Forcarei situáronse ao redor do 83 %, o que supón un lixeiro ascenso con respecto a tempadas anteriores.
En canto ás cidades, segundo Aviturga recuperaron a porcentaxe de reservas anterior á pandemia, acadando Vigo un 85 %, Santiago un 84 %, e A Coruña, Ourense ou Lugo, un 83 %.
Hóspedes galegos e de Asturias, Castela e León ou País Vasco
A Asociación de Vivendas Turísticas de Galicia revelou que a procedencia dos hóspedes destes aloxamentos en xullo foi maioritariamente Asturias, Castela e León e País Vasco, sumando a un importante movemento interprovincial de residentes en Galicia.
En canto ao perfil do turista, predominou o carácter familiar. «Notamos un cambio importante. Volvemos á viaxe en familia que era tan habitual hai unhas décadas. Este mes aloxamos a familias con membros de tres xeracións, avós, fillos e netos, gozando xuntos das vacacións», explica Dulcinea Aguín, presidenta de Aviturga.
De cara a agosto, as previsións da asociación son «extraordinarias» e afirman tamén que «sorprende » a porcentaxe de ocupación previsto para setembro, o que permite apreciar unha maior desestacionalización turística, cun gran número de viaxeiros que escapan dos meses centrais do verán para optar por xuño ou setembro, en busca de máis tranquilidade e menos xente.