As asociacións de veciños de Teis e Chapela convocan unha concentración para esixir a supresión «real» das cabinas de cobro
30 jul 2021 . Actualizado ás 05:00 h.Os veciños de Redondela, tras moitos anos esixindo a eliminación total da peaxe Redondela-Vigo, quedaron desconformes coas novas bonificacións. E é que, no seu momento, o exministro de Fomento Íñigo da Serna declarou que a peaxe dese tramo ía ser eliminado no ano 2019. Unha decisión que nunca levou a cabo e que a poboación de Chapela e Teis segue reclamando.
A aplicación das novas medidas suporá unha bonificación do 100 % do custo, pero só para unha serie de condutores. Deste xeito, será gratuíto exclusivamente para os usuarios que realicen un traxecto de ida e volta iguais en 24 horas e dispoñan de telepeaxe.
«É inxusto. Non é normal que nun tramo tan pequeno teñamos que pagar un euro. E non é normal que para uns sexa gratis e para outros non. Debería ser gratuíto para todo o mundo», di María Fernández, que se ve obrigada a pagar a peaxe varias veces á semana. Os veciños de Redondela non entenden por que as rebaixas só se aplican para os condutores con telepeaxe e non para todos os usuarios. «É unha decisión discriminatoria. Todos deberiamos ser iguais. A xente con telepeaxe non debería ter un maior beneficio que os condutores que se pairan e pagan o euro na cabina», explica David Vázquez, que realiza ese traxecto dúas veces ao día e suponlle un custo de máis de 80 euros cada mes.
Os veciños recibiron estas rebaixas na autoestrada como un novo engano por parte do Goberno. Despois de moitos anos reclamando a desaparición total da peaxe, as bonificacións quedan escasas. «É unha fraude total. O alcalde leva anos dicindo que vai quitar a peaxe e nunca o fixo», indica Isabel Isidoro, veciña de Redondela que se despraza todos os días a Vigo por cuestións laborais. Ante esta situación, as asociacións veciñais de Teis e Chapela convocaron unha concentración na rotonda de Cabanas-Rande para esixir a supresión «real» da peaxe do tramo Redondela?Vigo.
No sector do transporte a noticia tampouco foi ben recibida. «Paréceme unha decisión tardía e mala. É un castigo aos transportistas. Tiñamos apalabrado un 60 % de rebaixa e tan só se realizou un 20 %», exclama o director da Asociación de Transportistas Ramón Alonso, aínda que a peaxe no tramo de Redondela será gratuíto para eles.
