A Xunta adapta á pandemia o novo plan director, dotado con 478 millóns
21 jul 2021 . Actualizado ás 19:36 h.O Xacobeo ampliado ata o 2022 deixará a Galicia ás portas da recuperación completa do sector turístico, pero haberá que agardar ata o 2023 para acadar o listón de marca que deixou o 2019 e a reparación dos ingresos, diminuídos pola inestabilidade xerada pola crise sanitaria. É un dos retos fixados no plan director Galicia Destino Seguro 2021-2023 que a Xunta lle presentou ao sector. Tocaba redeseñalo co horizonte posto no 2030, pero a pandemia obrigou ao Goberno galego a reformular obxectivos nun período de tempo máis curto e intenso.
As expectativas para este ano mantéñense nos tres millóns de turistas a pesar da crecente inquietude pola onda de contagios, e no 2022 confíase en chegar aos 4,6 millóns, alimentados pola recuperación parcial da mobilidade internacional. Máis aló de cifras e retos xenéricos, o Executivo quixo pór por diante a necesidade dunha «recuperación emocional» por parte do sector tras o impacto dos últimos meses. O presidente da Xunta non puido acudir finalmente ao acto xunto aos principais actores económicos porque precisamente estaba a dar conta das novas medidas sanitarias, que seguirán condicionando o comportamento turístico nas próximas semanas. Con todo, o vicepresidente primeiro e responsable de Turismo, Alfonso Rueda, remarcou o «inxusto» que suporía cargar sobre os hoteis e a restauración as consecuencias do actual repunte na expansión dos contagios.
Haberá inxección de diñeiro público, de forma directa a través de axudas, ou con investimentos que sumarán uns 478 millóns de euros, contando todos os conceptos que contribuirán á dinamización económica, mobilizando uns mil millóns de euros. O plan director conta con sete eixos, pero os obxectivos prioritarios son dous: o primeiro, a supervivencia do tecido empresarial, coa continuidade de liñas de apoio para hoteis, restaurantes, axencias e outros activos como os congresos; e aproveitar a situación para avanzar na modernización dos negocios a nivel tecnolóxico e a formación do persoal, incidindo na seguridade sanitaria, que seguirá sendo determinante na elección dos consumidores, que terán un perfil distinto.
Novos produtos
Turismo buscará novos produtos adaptados ás circunstancias, pero sen renunciar aos elementos recoñecibles e recoñecidos de Galicia, como o territorio e a natureza, a gastronomía e a cultura, impulsando as sinerxías co norte de Portugal e coa sustentabilidade como bandeira para acabar conformando unha oferta «de calidade e competitiva», resumiu a directora de Turismo, NavaCastro , que tamén puxo á «hospitalidade» como un dos valores cos que a comunidade marca diferenzas no mercado. De momento, a promoción e comercialización vai seguir moi centrada no turismo de proximidade, clave para que a estrutura poida manterse ata que se recuperen os fluxos internacionais.
A pesar de que os mercados seguen constreñidos pola baixa mobilidade, Galicia está presente nos plans vacacionais dos españois, e o Camiño estase revelando como unha das preferencias. Segundo Rueda , xullo pecharase con 50.000 peregrinos acreditados en Santiago..