Facenda aproba os trámites para que Transportes impulse o decreto que rebaixe as peaxes

A aplicación dos descontos nas peaxes da AP-9 superou xa o principal escollo para abaratar a factura dos condutores nos próximos días. Segundo indican fontes do Ministerio de Facenda, emitíronse xa os informes positivos por parte da Secretaría de Estado de Orzamentos e pola Secretaría Xeral Técnica para que o Ministerio de Transportes presente o real decreto que recolla as bonificacións nas cabinas de cobro da autoestrada. Os prazos dependen xa, polo tanto, do traballo que realice o departamento da ministra Raquel Sánchez.

Os técnicos de Facenda apuraron esta semana os prazos para desbloquear o decreto, despois de que se aprobase no consello de ministros do martes un acordo polo que Transportes poderá dispor de fondos públicos para custear os descontos ata o fin da concesión, no 2048. Ese «importante paso» consistiu en modificar os límites de gasto da lei orzamentaria e ampliar o número de anos nos que se poderá contar con ese diñeiro. En total, o Goberno destinará uns 2.300 millóns de euros durante os próximos 27 anos a dar cobertura ás rebaixas.

Desde o Ministerio de Transportes trasladan o seu interese por que o real decreto se aprobe «canto antes». O prazo inicial para a entrada en vigor dos descontos nas cabinas de cobro da AP-9 estaba previsto para este mes, segundo comprometeuse o anterior ministro, José Luis Ábalos, co presidente da Xunta durante o seu último encontro a principios de abril. A falta de dúas semanas para que remate xullo, o máis probable é que as bonificacións se apliquen en agosto, tal e como recoñeceu esta semana o delegado do Goberno en Galicia, José Miñones. 

Volta gratuíta

Así, previsiblemente nun mes, os condutores que dispoñan dun dispositivo de telepeaxe no seu coche poderán realizar a viaxe de regreso na AP-9 de forma gratuíta. Tamén se creará a figura do usuario superrecurrente, cun 20 % de desconto, para aqueles que fagan un mínimo de vinte viaxes ao mes.

---

---

---