Gonzalo Caballero xustifica frear o traspaso da AP-9: «Á xente preocúpanlle as peaxes, non a súa titularidade»
GALICIA
O secretario xeral socialista cre que cambiar o titular da vía durante a negociación das rebaixa pode complicalas xuridicamente. O BNG lémbralle que é un compromiso pactado co PSOE
22 jun 2021 . Actualizado ás 05:00 h.O secretario xeral do PSdeG-PSOE, Gonzalo Caballero, xustifica que o grupo parlamentario socialista no Congreso teña proposto frear o traspaso da AP-9 á Xunta, en contra da petición unánime do Parlamento galego e que el mesmo reclamou ante as Cortes.
«Á xente preocúpanlle as peaxes e as rebaixas que van ter, non a titularidade da autoestrada», mantén o líder dos socialistas galegos. «Eu non refugo a petición do Parlamento, nin renuncio a que se ceda a titularidade, pero o prioritario para nós é a rebaixa das peaxes, esa é a clave», incide Caballero. Para el, cambiar ao titular da infraestrutura cando se ultiman as rebaixas e bonificacións das súas peaxes podería pólas en perigo desde un punto de vista xurídico e legal. «Queremos que sexan unhas rebaixas solventes e permanentes, que nada as poñan en perigo ata o 2048», data de finalización da concesión.
En todo caso, o secretario xeral do PSdeG mantén que as emendas presentadas polo seu partido, e nas que expuña que a Xunta xestione a AP-9 peros que siga dependendo do Goberno central, «son un punto de inicio», sinala, á vez que atribúe a PP e BNG querer polemizar coa proposta do PSOE «porque quedaron fóra das rebaixas da autoestrada ao votar contra os orzamentos que as farán posibles».
«Gato por lebre»
A conselleira de Infraestruturas, Ethel Vázquez, considera pola súa banda que o Goberno e o PSOE «hannos vendido gato por lebre, prometeron mesmo como feito histórico a transferencia, pero agora expoñen unhas condicións que resultaría mellor quedarnos como estamos», sinala respecto da posibilidade de que a Xunta teña que responsabilizarse da xestión da AP-9 peros capacidade de decisión limitada. «Ou tiñan vontade de enganarnos ou nos estiveron mentindo meses».
A conselleira lembra que o ministro Ábalos no seu ultima visita comprometeu «aplicar as rebaixas en xullo e en paralelo a transferencia», polo que avanza que esixirá ao Goberno que aclare se agora defende que se pare o traspaso da autoestrada a Galicia. «Non me creo que o argumento real sexa o de paralizar a transferencia para non poder en perigo as rebaixas. Hai xeito de blindarlas, por iso fainos desconfiar», recalca a conselleira que, lembra que Pedro Sánchez traspasou ao País Vasco a AP-68 sen problemas, a pesar de transcorrer por dúas autonomías e desembocar nunha fronteira.
O BNG cargou onte contra a proposta do PSOE de traspasar só a xestión da AP-9, posibilidade que o seu portavoz nacional, Ana Pontón, cualificou de «transferencia de segunda». «É unha tomadura de pelo aos galegos», terció, mentres o deputado do Bloque, Néstor Rego, considera que o PSOE está modificando o acordo de investidura «pola porta de atrás», en referencia ao pacto que ambas as forzas subscribiron a cambio do voto nacionalista á investidura de Pedro Sánchez. Rego di que Gonzalo Caballero «prioriza obedecer ao Ministerio por riba do acordo do Parlamento galego».