Os concellos teñen tres semanas para reducir a velocidade en miles de rúas

«Nun atropelo a 50 quilómetros por hora, o 50 % dos peóns morren. A 30 por hora, a porcentaxe de falecementos redúcese a un 10 %». «No 2019, o 82 % dos mortos nas cidades eran usuarios vulnerables: peóns, ciclistas e motoristas». «Reducir os límites máximos de velocidade nos tramos urbanos é o instrumento máis eficaz de seguridade viaria urbana, porque é doado e barato facelo». Son os argumentos que expón a Dirección Xeral de Tráfico (DXT) para reducir de 50 a 30 e a 20 quilómetros por hora os límites xenéricos de velocidade en miles de vías urbanas e executar así a maior transformación do tráfico nas cidades desde a implantación do semáforo.

En Galicia hai máis de trinta mil cales e a maioría son dun carril por sentido, que son as que deberán ter un novo límite de velocidade a partir do 11 de maio, martes, que é cando entrará en vigor a reforma do Regulamento Xeral de Circulación. Os concellos teñen, xa que logo, tres semanas para cambiar sinais e para adaptar a circulación á nova normativa. Nada será igual desde ese día, un martes. Así o creen na DXT e na Federación Española de Municipios e Provincias (FEMP), que van da man no proxecto. «Os propios concellos pedíronnos esta medida: Bilbao, Madrid, Barcelona, Zaragoza, Valencia... No Goberno sorprendéronse cando levamos o expediente para a reforma e viron as cartas dos municipios e o apoio da FEMP. Todo foi máis doado así», explica o director xeral de Tráfico, PereNavarro , que esta semana presentou o manual elaborado pola DXT e a FEMP coas recomendacións a seguir en 32 supostos.

É unha guía que xurdiu por mor das dúbidas que os concellos trasladaron á DXT desde que o pasado novembro se aprobou a reforma, que daba seis meses de prazo para implantar as novas velocidades en vías urbanas, e foi enviada a todos os concellos de España e pódese descargar das páxinas web da DXT e da FEMP.

«Nas cidades hai cada vez máis actores: o peón, o ciclista, o do patinete, o motorista, o bus urbano, o repartidor de mercancías. É unha interacción na que non é posible garantir a seguridade a velocidades superiores a 30 quilómetros por hora», engade Navarro. A cidade era a materia pendente da DXT. O número de mortos baixa na estrada (un 6 % no 2019), pero aumenta en cidade. O director de Tráfico aclara que os concellos poderán aumentar a 50 a velocidade en determinadas rúas de 30, aínda que só de forma excepcional: «Esta reforma é un paraugas normativo para os municipios», sinala Pere Navarro, que asegura que non é unha medida illada, senón que forma parte dun proxecto a medio prazo no que están implicados os concellos e que busca un tráfico máis acougado: «Se cadra, permítenos quitar sinais das beirarrúas. Incluso algún día poderemos pensar en quitar algún semáforo se conseguimos acougar o tráfico nas cidades».

O máximo nas travesías será de 50, pero poderá ser rebaixado polo concello

O artigo 50 do Regulamento Xeral de Circulación é o que entra en vigor o próximo 11 de maio e establece os novos límites xenéricos de velocidade nas vías urbanas e travesías.

os novos límites

20 quilómetros por hora. Velocidade máxima permitida en rúas que dispoñan de plataforma única de calzada e beirarrúa.

30 quilómetros por hora. Límite xenérico de velocidade destinado ás rúas que teñen un único carril por sentido de circulación. As vías con esta configuración son a maioría nas cidades e vilas de Galicia, polo que a medida terá unha gran incidencia na circulación.

50 quilómetros por hora. É a velocidade xenérica existente na actualidade nos centros urbanos. A partir do 11 de maio ese límite aplicarase nas vías de dúas ou máis carrís por sentido de circulación. 

competencia municipal

Poden rebaixar os límites. A normativa que entrará en vigor o 11 de maio establece que os gobernos locais poderán rebaixar esas velocidades xenéricas, previa sinalización específica. Tamén, aínda que de xeito excepcional, poderán aumentar o límite nas rúas de 30, cun único carril, ata un máximo de 50, e tamén previa sinalización. 

carrís especiais

Non se contabilizan. O artigo 50 especifica que os carrís reservados para a circulación de determinados usuarios ou para o transporte público non contabilizan á hora de establecer as velocidades máximas. Iso quere dicir que, por exemplo, se hai dous carrís e un é un carril bus, a norma para o outro sería a de 30 por hora.

travesías

50 quilómetros por hora. O límite máximo de velocidade nas travesías será de 50 quilómetros por hora para todo tipo de vehículos. Ese límite poderá ser rebaixado por acordo das autoridades municipais co organismo titular da estrada que atravesa o termo municipal.

autovías en poboado

Límite de 80 por hora. É a velocidade xenérica establecida para os tramos de autovías e autoestradas que discorren por zonas urbanas. O límite poderá ser ampliado, previo acordo co titular da vía.

---

---

---