A Audiencia Provincial de Pontevedra considera que non hai probas que permitan establecer ese delito
04 mares 2021 . Actualizado ás 00:18 h.A Audiencia Provincial de Pontevedra confirmou o sobresemento da querela contra o ex-deputado madrileño Eduardo Tamayo por unha presunta extorsión a Alfonso Caneiro, un empresario do sector pesqueiro de Vigo.
O industrial galego facía responsable ao político -coñecido polo tamayazo na Comunidade de Madrid que permitiu o Goberno de Esperanza Aguirre- dunha trama extorsionadora na que tamén figuraba o responsable do sindicato de Mans Limpas, Miguel Bernat, e un xornalista dun diario dixital con sede en Madrid, entre outros.
A sentenza de primeira instancia estimaba que do resultado das dilixencias e do atestado policial non se podía concluír que houbese «conivencia entre os denunciados para extorsionar ao denunciante». O auto recente da Audiencia Provincial considera «impecable» esa decisión do instrutor de arquivar as actuacións porque «resulta difícil soster ese acordo ou plan no que participaron todos os denunciados».
En outubro do 2020, Alfonso Caneiro denunciou que lle esixían o pagamento dunha suposta débeda de 400.000 euros baixo ameaza de desprestixiar a súa reputación persoal publicando noticias falsas. Eduardo Tamayo negou calquera conduta delituosa e argumentou que era un diñeiro que o empresario vigués lle debía por prestarlle os seus servizos como avogado en Guinea.
O expolítico madrileño traballou catro anos para Caneiro, constando que a súa minuta era do 10 % da cantidade que obtivese nun preito contra o goberno de Guinea Ecuatorial por paralizarlle un barco de pesca tres anos. O Goberno africano aceptou que se produciu unha neglixencia, e indemnizou ao empresario vigués con 7,8 millóns de euros e a devolución dos dous barcos. A Tamayo corresponderíanlle preto de 800.00 euros polos servizos prestados, pero o empresario vigués só lle pagou a metade. Tamayo segue reclamando o diñeiro restante por vía civil.