A ampliación do Xacobeo permitirá centrar os actos galegos e nacionais no 2021 e deixar os internacionais ao 2022
GALICIA
Núñez Feijoo: «Os galegos imos aproveitalo ben para relanzar Galicia»
02 ene 2021 . Actualizado ás 17:50 h.A presenza de Bernardito Auza, nuncio do papa, na apertura da Porta Santa e no inicio dun novo Xacobeo non podía traer mellores noticias para Galicia, co anuncio da ampliación do ano santo ao 2022. «Eu esperaba que puidera ser ata xullo do 2022, pero a boa nova foi máis que boísima», dixo o presidente da Xunta pouco despois de coñecerse a prórroga, na tarde do 31. «Os galegos imos aproveitalo ben —recalcou Feijoo—. Ímolo aproveitar para relanzar Galicia».
Nin o mandatario galego nin o alcalde de Santiago souberon ata unhas horas antes que o papa decidira ampliar un ano máis o ano xubilar, e nin sequera sabían que a prórroga sería ata finais do 2022. De feito, foi o arcebispo de Santiago o que onte explicou como se xestou a indulxencia plenaria extraordinaria: «Hai que agradecerlle ao santo pai que teña concedido esta graza, porque depende de el», sinalou Julián Barrio aclarando que a apertura do ano santo é da súa competencia, pero que a prórroga só podía outorgala o papa. O arcebispo recoñeceu que está a recibir comunicacións de peregrinos de todas as nacionalidades agradecendo a decisión do pontífice, «porque na actual situación sanitaria non é doado que moitos peregrinos poidan chegar ante a tumba do Apóstolo», e agora «haberá máis posibilidades».
A boa nova, en palabras de Feijoo, posibilitará un 2022 «magnífico». Pero non só iso, senón que tamén permitirá á Xunta organizar mellor o Xacobeo, xa que como recoñeceu o vicepresidente e responsable de Turismo, Alfonso Rueda, «agora temos máis tempo para planificar». E aínda que se abren novas expectativas sobre as actividades xa previstas e sobre as que agora se poderán prever, o presidente da Xunta avanzou ante a catedral de Santiago por onde podería ir a nova planificación, cun 2021 dedicado, sobre todo, a aliviar a situación dos sectores máis afectados polo covid, e un 2022 que, se a pandemia o permite, posibilitaría facer realidade o que se previu antes da chegada do coronavirus, cando se pensaba «no mellor Xacobeo da historia».
O primeiro semestre do 2021, polo tanto, sería «máis para Galicia, máis intimista, máis propio, máis do pobo galego», dixo Feijoo. A partir de xullo, a chegada do verán e a xeneralización das vacinas permitiría ampliar os eventos ao panorama nacional. E o que estaba previsto «dende hai moito tempo» para o 2021, «imos facelo no 2022», adiantou o presidente da Xunta, convencido de que para entón «a maioría da xente vai estar inmunizada», o que permitiría celebrar o groso dos eventos internacionais no segundo ano.
Marxe para a visita do papa
A ampliación tamén permite contar cunha marxe maior para que o papa visite Santiago. Estaba previsto que o fixese, se a pandemia o permitía, coincidindo coa celebración do ano ignaciano en Manresa. Pero como o quinto centenario da conversión de san Ignacio de Loyola esténdese desde o 20 de maio do 2021 ao 31 de xullo do 2022, xa nada impide que o pontífice Bergoglio acuda a Compostela na prórroga do ano santo.
