O Bloque duplicará os ingresos tras crecer e converterse en líder da oposición
28 novs 2020 . Actualizado ás 05:00 h.O Parlamento galego publicou xa no seu portal de Internet o réxime de subvencións que aplicará aos grupos políticos no arranque da actual lexislatura, que é o mesmo que na anterior, pois as cantidades se manteñen conxeladas. O que si varía é a composición dalgunhas forzas. O PSdeG segue igual, con 14 parlamentarios, e o PP subiu un máis e ten 42. O gran cambio está no BNG: o seu avance nas autonómicas do 12J, nas que triplicou o seu número de escanos (de 6 a 19), permitiralle aumentar de xeito substancial os seus ingresos, xa que parte das axudas outórganse en función da representación, a razón de 1.837 euros ao mes por deputado.
Co réxime de asignacións vixente, os tres grupos repartiranse un talón de case 9 millóns de euros durante esta lexislatura, que concluirá, salvo sorpresas, a mediados do 2024. Nese importe contabilízanse só as axudas directas que concede o Parlamento para garantir a operatividade dos grupos, pois a maiores os partidos tamén obteñen outra inxección financeira da Xunta para afrontar as eleccións. De feito, tras a cita do pasado 12 de xullo, o PP recibiu por esa vía 1,4 millóns de euros; o BNG, 732.000, e o PSdeG, outros 586.000 euros.
O sistema de financiamento dos grupos políticos que rexe no Parlamento consta de tres conceptos: a asignación fixa, a variable e a finalista. A primeira son 9.971 euros ao mes que recibe cada formación por igual, xa teña un mínimo de 5 deputados ou unha maioría absoluta de 38. A segunda, a asignación variable, vai en función do número de deputados, o que permite ao PP ingresar ao mes 77.154 euros polos seus 42 escanos, cifra que descende a 25.718 no caso do PSdeG. E a terceira, a finalista, é unha axuda a xustificar de 5.898 euros ao mes a cada grupo para contratar asesores ou para adquirir material.
A suma de todos eses conceptos iguala o financiamento que recibe o PSdeG, e a do PP experimentará un lixeiro incremento de 1.837 euros ao mes por ter un deputado máis. O gran cambio producirase no BNG, pois o seu caudal global de ingresos vaise duplicar, e mesmo a triplicar no caso da asignacións variables. Na pasada lexislatura, o Bloque obtivo 11.022 euros ao mes polos seus seis deputados, cifra que agora sobe a 34.903.
A extensión das asignacións a toda a lexislatura permitirá ao PP de Feijoo ingresar 4,46 millóns en axudas do Hórreo, a razón de 1,11 millóns por curso. O BNG obterá no cuadrienio 2,43 millóns (609.282 euros ao ano), o dobre que na lexislatura pasada (1,29 millóns). E para o PSdeG de Gonzalo Caballero quedará en 1,99 millóns (499.000 euros ao ano). En total, son 8,9 millóns que repartirá a Cámara para garantir o funcionamento dos grupos, sempre que non se altere o réxime de asignacións.
A formación que dirixe Ana Pontón acaba de vivir unha década de vacas fracas, facendo fronte a unha débeda superior aos 3 millóns de euros herdada da etapa en que, con Anxo Quintana á fronte, chegou a pisar a moqueta da Xunta. Daquel pasivo só quedan agora 244.497 euros por amortizar, segundo a contabilidade consolida do 2019 que o Bloque Nacionalista remitiu ao Tribunal de Contas.
Os nacionalistas recupéranse tras unha etapa complicada
O BNG aprobou no 2012 un ERE interno que reduciu case á metade o seu cadro de persoal e converteu en mileuristas a técnicos e asesores. Agora, a presenza de Néstor Rego no Congreso engade unha nova vía de financiamento público para o BNG, á que suma os ingresos do Parlamento galego. No 2016, o BNG valoraba facer desaparecer as súas siglas no medio dunha refundación e sopesaba liquidar algunhas sedes.