O PP acusa aos nacionalistas de imitar aos cataláns para retroceder «en todo o avanzado en política lingüística en Galicia»
27 novs 2020 . Actualizado ás 18:21 h.A deputada do BNG Mercedes Queixas presentou no Parlamento de Galicia unha proposición non de lei para que o galego sexa lingua vehicular no ensino. A entender da parlamentaria nacionalista, que defendeu a postura do seu partido na comisión de Educación, fai falta «unha nova normativa» para garantir «a competencia lingüística en galego desde o ensino obrigatorio», e que o Goberno autonómico cumpra coa obrigación de avaliar anualmente o decreto do bilingüismo. Queixas lembrou que a UE recriminou á Xunta pola «insuficiente» presenza do galego no ensino.
A iniciativa foi rexeitada polo PP, que mantén o seu defensa dun modelo de «bilingüísmo cordial totalmente normalizado» que, ademais, «promove a aprendizaxe de linguas estranxeiras e un aproveitamento intenso da lusofonía». Así o defendeu a deputada popular Sandra Vázquez, quen cualificou a lei Celaá como «unha cesión política e partidista á inmersión lingüística monolingüe» ao considerar que o castelán xa non é lingua vehicular no ensino. Vázquez acusou aos nacionalistas galegos de «querer parecerse aos cataláns», que pretenden retroceder «en todo o avanzado en política lingüística en Galicia».