Propón reforzar os vínculos cos países lusófonos e o BNG obxecta que «expresa de maneira enfermiza» a submisión a Madrid
24 novs 2020 . Actualizado ás 13:23 h.Catro anos despois de que o Tribunal Constitucional anulase boa parte da lei catalá de Acción Exterior por invadir competencias propias do Estado, como a capacidade para establecer relacións bilaterais con outros países ou a apertura de delegacións diplomáticas, Galicia convértese na segunda comunidade autónoma que quere regular por lei a súa vocación de ter máis peso na política exterior de España, a través da participación nos órganos da Unión Europea (UE) e ampliando os vínculos directos con Portugal e os países lusófonos, así como coa diáspora galaica e as redes rexionais ou lobbies que comparten os mesmos intereses que Galicia.
O proxecto de foi Lei de Acción Exterior e Cooperación para o Desenvolvemento de Galicia aceptada a trámite este martes no Parlamento galego, aínda que só o fixo cos votos da maioría do PP, pois as forzas da oposición pediron a súa retirada. O texto deixa claro no seu artigo 1 o ámbito en que se propón mover Galicia, ao subliñar que a acción exterior galega «desenvolverase sempre con lealdade ao bloque da constitucionalidade española, aos tratados e restantes instrumentos internacionais subscritos por España, así como ás normas de dereito comunitario».
O vicepresidente primeiro da Xunta, Alfonso Rueda, puxo de relevo que o precedente catalán «nos leva a non repetir os erros» que suscitaron a súa suspensión para conseguir así outros obxectivos, como son —enumerou— a mellora da atención aos galegos non exterior, a consolidación da Eurorrexión Galicia-Norte de Portugal ou o afondamento nas relacións con Portugal e os países da lusofonía, unha vez que Galicia está a piques de culminar o seu ingreso, a través de España, na Comunidade de Países de Lingua Portuguesa.
O PSdeG acolleu con desdén o proxecto de lei que «ten sentido para dotar a Galicia dunha acción exterior eficaz e eficiente, que é algo do que a Xunta ven carecendo nos úlltimos 11 anos», sinalou Pablo Arangüena. Pero a crítica máis contundente viño das filas do BNG, que a tachou a lei de «raquítica, acomplexada e falta de ambición», así como de «terraplanista» porque non ve nada máis aló do vasto Atlántico. O deputado Luís Bará dixo que o texto expresaba «de maneira enfermiza a submisión a Madrid» e subliñou que os nacionalistas non quería a lei dunha rexión, senón a de «unha nación no mundo que se chama Galicia».
Desde o PP puxeron por diante que, con esta formulación do BNG, vai ser moi difícil chegar a un entendemento, pois o deputado Alberto Pazo ve nos nacionalistas un intento de reproducir a lei catalá. Obxectou Pazos que o Bloque expoña «como febleza» a coordinación da acción exterior de Galicia coa do Estado para deixar claro o seguinte: «Para nós isto é unha fortaleza».