A pandemia non exime aos pais de levar aos nenos a clase, segundo a Avogacía do Estado

A Avogacía do Estado concluíu que a pandemia do covid-19 non ampara por si mesma a conduta dos pais que decidan non levar aos seus fillos ao colexio por temor ao contaxio, pero recomenda analizar «caso por caso» por se existise unha xustificación do absentismo, xa sexa pola evolución da pandemia ou por razóns de saúde do menor ou de familiares convivientes «maiores» ou «con patoloxías previas».

«A análise débese facer caso por caso. Non cabe concluír en abstracto que a situación actual ampare directamente a actuación dos pais que deciden non escolarizar aos seus fillos», subliña a Avogacía nun informe redactado a petición do subsecretario de Educación e Formación Profesional, ante o movemento de pais que se negan a levar aos seus fillos ao colexio pola pandemia.

En todo caso, segundo informa Europa Press, considera que o temor fundado nunha situación desfavorable de evolución da pandemia, con transmisión comunitaria, pode xerar «unha lexítima preocupación pola integridade física dos menores e dos seus familiares convivientes», maiores ou con patoloxías previas, que lles exima de responsabilidade.

No entanto, a Avogacía do Estado precisa que para determinar se estas condicións de cada familia xustifican «un medo insuperable» deberá «examinarse caso por caso», tendo presente tanto o contexto de evolución da pandemia en cada parte do territorio, como no suposto concreto de cada fogar.

Desta forma, engade, poderíase constatar se a falta de asistencia á escola está ou non xustificada pois, segundo lembra a Avogacía, só cabe apreciar absentismo escolar cando a inasistencia a clase de forma reiterada non estea xustificada.

Neste sentido, precisa que a situación particular de cada menor, por razóns de saúde, tanto do menor como dos seus familiares convivientes, así como a situación de evolución epidemiolóxica «poden constituír unha causa de xustificación do absentismo».

En todo caso, a Avogacía insiste na obrigatoriedade do ensino básico de acordo co artigo 27 da Constitución Española, e a obrigación dos pais a garantir que os seus fillos asistan «regularmente» a clase, de acordo coa Lei reguladora do Dereito á Educación.

Así, advirte a aqueles pais que non leven aos seus fillos á escola de forma reiterada de que estarían incumprindo as normas. De feito, engade que de producirse estas situacións, e de entender que son inxustificadas, os colexios deben proceder «de inmediato» á comunicación á autoridade competente.

En «situacións límite», avisa de que a negativa dos pais a que os seus fillos acudan a clases presenciais no centro escolar podería constituír un delito de abandono familiar, que implica unha pena de inhabilitación de entre catro e dez anos para exercela.

A Avogacía lembra aos pais que consideran que a volta ao colexio non se realiza de forma segura, que poden presentar un recurso contencioso-administrativo contra esta decisión, con posibilidade, por exemplo, de instar a suspensión cautelar das decisións administrativas de fixación da data de comezo de curso.

---

---