Detectados casos de coronavirus en colexios da Coruña, Cambre, Ourense, Pontevedra, Ribadeo, Vigo, Santiago e Padrón
GALICIA
Os positivos aumentan nas aulas de infantil, que adoitan quedar en corentena
17 sep 2020 . Actualizado ás 20:34 h.Este xoves detectáronse oito casos de coronavirus na escola galega, concretamente na Coruña, Cambre, Ourense, Pontevedra, Ribadeo e Vigo. Xa son 40 os positivos (en garderías e centros de infantil e primaria) e 32 os colexios afectados; segue sendo unha minoría, xa que hai máis de mil centros na comunidade funcionando agora mesmo.
En Ourense foron dous os colexios afectados. No centro concertado San José Josefinas, o positivo de un alumno de quinto de infantil supuxo a corentena de todosos seus compañeiros de clase e da titora. No colexio Divina Pastora Franciscanas tamén se confirmou o caso dun alumno, pero nesta ocasión só catro compañeiros teñen que gardar illamento, xa que ao tratarse de alumnos maiores as autoridades sanitarias creen que non hai risco de contaxio masivo.
Volven detectarse positivos nun colexio de Pontevedra cidade, despois do peche xa o luns de Calasancio. Nesta ocasión é o CEIP Praza de Barcelos e son dous as aulas de primaria afectadas, por senllos positivos; os alumnos e titores están en corentena.
En Vigo o virus chegou ao colexio María Auxiliadora Salesianos, onde se detectou un positivo por coronavirus nunha clase de quinto curso de primaria. Por iso, desde este xoves permanecen en corentena os 24 alumnos compañeiros do menor e a titora da clase.
O caso da Coruña é diferente aos anteriores, xa que foi unha profesora de primaria do CEIP Rosalía de Castro a que deu positivo. Os vinte alumnos da aula deben gardar corentena. Preto, en Cambre , un neno de infantil do CEIP Wenceslao Fernández resultou positivo en coronavirus e a clase enteira xa está illada.
Pola súa banda, no colexio concertado Sacro Corazón de Ribadeo hai un neno que hai xa días que non vai a clase, e agora confirmouse que ten coronavirus. En vista do caso particular, Sanidade non aconsellou illamento da súa clase, e só se fixo unha PCR a un dos compañeiros, que deu negativo. Ademais, hai dous alumnos máis en confinamento á espera do realizar a proba porque deu positivo un dos seus proxenitores.
Os dez alumnos da unitaria de Gaioso-O Eixo, en Santiago, permanecen confinados nas súas casas desde o luns pola aparición dun positivo na aula. E no CEIP Rosalía de Castro, de Padrón, o illamento afecta a dúas aulas de primeiro e sexto de primaria, ás que asisten dous irmáns que deron positivo. En primeiro curso son 21 os nenos en corentena, e en sexto, 20.
Un 36% de españois quere só clases presenciais e outro tanto, mixtas
No barómetro do CIS de setembro os españois responderon a unha pregunta específica sobre o ensino en corentena, e o resultado demostra que hai división. Ante a pregunta de que tipo de ensino debería organizarse durante este período, o 36,1% dos enquisados apostaba polas clases presenciais, pero un 35,8% cría que debían ser mixtas: en liña e no centro. Claro que había case un 10% que prefería as clases só virtuais e un 4%, que non haxa clases. A enquisa realizouse entre os día 1 e 7 de setembro, antes do inicio do curso.
