A candidata do BNG eloxia o caso vasco, onde hai «un goberno en clave de país» , e pide unha gran mobilización nas urnas para propiciar a substitución en Galicia
30 may 2020 . Actualizado ás 20:16 h.Para o BNG, a cita do 12 de xullo exponse cunha única disxuntiva: «Ou cambio galego da man do BNG, ou a lenta decadencia que representa o PP, ou catro anos de “máis do mesmo”, ou poñer en marcha o cambio galego». Así tivo pensado este sábado en Santiago Ana Pontón, a candidata nacionalista nun encontro xunto aos cabezas de lista das catro provincias.
«O obxectivo é poñer en marcha un cambio galego liderado por un goberno que mire polo noso, centrado en poñer a producir Galiza e en levantar o país», dixo a portavoz nacional, que insistiu na necesidade de nacionalizar Alcoa ante a ameaza dun peche parcial da factoría da Mariña. «Non podemos permitir que se siga destruíndo emprego no país, porque iso significa pobreza, significa ter que acudir a rendas sociais por iso asumo o compromiso de nacionalizar Alcoa para garantir a produción e os postos de traballo».
«Quero ser -engadiu- a presidenta do cambio galego, a presidenta dun país vivo, xusto, con impulso e iniciativa, con capacidade para tomar as súas decisións e con futuro, a presidenta que poña en marcha unha nova Galiza na que haxa igualdade e oportunidades». Pontón puxo como exemplo o caso vasco, o de «un pobo avanza da man dun goberno que se fai valer, defendendo solucións beneficiosas». Nesa comunidade goberna o PNV, agora co apoio do PSE.
Pontón pediu unha mobilización nas urnas para que haxa cambio de Goberno o 12J. «Se hai unha candidatura capaz de ilusionar e mobilizar para o cambio real esa é a do BNG, e para min é un orgullo e unha responsabilidade que sexamos a forza que canalice esa simpatía e ese desexo, sobre todo nun contexto como o actual», completou.