O condutor, un veciño de Vilalba, precipitouse por un talude de 15 metros e recupérase en casa
10 ene 2020 . Actualizado ás 05:00 h.Óscar Mouteira Pernas, de 45 anos de idade e veciño de Vilalba , volveu nacer na mañá deste mércores. Este vilalbés é o sobrevivente dun aparatoso accidente rexistrado na autovía do Cantábrico (A-8) pasadas as once e media da mañá. Conducía un camión de recollida de leite con dobre remolque e ao seu paso polo quilómetro 54,100 da A-8, no termo municipal de Abadín , chocou por raspado negativo con outro camión, isto é, o rozamento que se produce entre os laterais de dous ou máis vehículos cando circulan no mesmo sentido.
A consecuencia do impacto, o seu camión precipitouse por un terraplén de terra duns 15 metros de altura con el no interior da cabina.
Un descoido do chofer puido ser a causa deste accidente, no que, a pesar da virulencia, o condutor resultou ferido leve. Tras un recoñecemento médico, Óscar Mouteira recupérase no seu domicilio do susto e prefire non facer declaracións. Está a recibir numerosas chamadas telefónicas e mensaxes de apoio tras o brutal sinistro.
O feito de que o condutor soamente sufrises feridas de carácter leve débese en primeiro lugar ao factor sorte. De sufrir o despeñamiento uns cinco metros máis adiante, as consecuencias fosen moito peores. E é que o punto no que se precipitou é unha zona de terra e tras precipitarse, o vehículo que conducía foi amortecendo na terra e freando o golpe. Uns cinco metros máis adiante non existe zona de terra, polo que é probable que o vehículo se precipitase directamente ao baleiro e caería directamente dun só golpe.
Operarios de conservación limparon toda a zona e colaboraron na retirada do vehículo, que quedou seriamente danado. Onte pola mañá aínda se podía ver a bionda de seguridade danada e un anaco de bloque de cemento deteriorado tras o impacto.
Non é o primeiro sobrevivente a un accidente destas características na provincia de Lugo. En xullo do ano 2017, un traballador que realizaba labores de roza en A-6, á altura do quilómetro 464, en Baralla, caeu coa súa escavadora ao baleiro a unha altura de 40 metros. Sufriu feridas graves pero sobreviviu.
