As prazas de acceso libre en Educación: 2.036 en total, 902 para repor vacantes e 1.134 para estabilizar
GALICIA
A repartición por especialidades non se saberá ata o 2020 e os sindicatos lamentan que os opositores estean a estudar sen coñecer a distribución
03 dic 2019 . Actualizado ás 21:31 h.Segue sen publicarse o número de prazas por especialidades, pero a Consellería de Educación aclarou algo máis da oferta de emprego do próximo curso, a máis ampla desde que a Xunta ten competencias en educación . Os responsables da Administración deron a coñecer aos sindicatos oficialmente a cifra de 3.654 prazas, pero entre elas só 2.036 son de acceso libre, xa que o resto son prazas para a creación de cátedras,1.300, e o resto de promoción interna.
As prazas libres proceden de dúas vías, a taxa de reposición e a estabilización. A primeira delas pretende cubrir as vacantes por falecemento, excedencias ou as daqueles profesores que se foron a outras autonomías tras participar no concurso de traslados; a segunda ten como obxectivo reducir a temporalidade, é dicir, a porcentaxe de interinos.
No 2019 a Consellería de Educación rexistrou a xubilación de 888 docentes; 17 pediron unha excedencia voluntaria e outros 15 faleceron. Dezaoito volveron a incorporarse ao sistema educativo por diferentes motivos, así que o saldo é de 902 prazas convocadas. A isto súmanse 1.134 para estabilizar emprego, unha cifra coa que a Xunta aproveita a lei do 2017 que permite utilizar os postos que non se estabilizaron nos dous últimos anos.
A falta de que se publiquen as prazas por especialidades, a maior oferta será a de ensino secundario: 1.041 postos entre acceso libre e promoción interna, mentres que no corpo de mestres haberá 747 prazas, todas de acceso libre. O director xeral de Centros e Recursos Humanos, José Manuel Pinal, insistiu en que é a maior oferta da historia e a máxima que permite a lei. Por iso a cifra non é negociable á alza, xa que non poden convocarse máis. Pinal lembrou que xa se informou de en que especialidades haberá prazas, 88, aínda que o número de postos de cada unha non se saberá ata a convocatoria.
Os sindicatos criticaron que non se coñeza a distribución por especialidades. Para Suso Bermello, de CIG-Ensino, o sistema debería atender a dúas realidades: a dos opositores que queren entrar no ensino público e a das persoas que levan décadas traballando nela. Tamén Julio Díaz, de ANPE, criticou o modelo de acceso, «tendo en conta ou acontecido nas últimas convocatorias, nas que se está a obviar sistematicamente a fase de concurso». Paula Carreiro, de UGT, coincide en agardar a que se coñeza a distribución para ver se a valoración é totalmente positiva, mentres que para José Fuentes , de Comisións, a oferta é satisfactoria.
