A presidenta desprázase a Galicia para intentar tranquilizar sobre a chegada do tren, aínda que evita dar un ano concreto
11 novs 2019 . Actualizado ás 17:54 h.A presidenta do ADIF, a galega Isabel Pardo de Vera , estivo na Coruña acompañada polo director xeral de Alta Velocidade, Juan Pablo Villanueva, nun acto organizado polo Colexio de Camiños para falar sobre as obras do AVE galego, un tema que se viu envolvido na polémica os últimos días á conta duns prazos que a Xunta asegura que non se van cumprir.
«Comprendo a incerteza da xente e do cidadán, pero está a traballarse a todo ritmo, as obras van en prazo», dixo Pardo de Vera . Na súa opinión, nunca han ir a tal velocidade, con máis de 5.000 millóns de euros contratados para facer o corredor galego. O que non fixo foi concretar prazos para a chegada do tren de alta velocidade.
«Non me poden pedir se se acaba o 27 de xaneiro ou o 27 de febreiro. Acábanse, e ese é o horizonte», apuntou, aludindo a que non se pode fixar un día e a que haberá que asumir unha certa flexibilidade nas datas, que non concretou. É dicir, séguese sen saber se estará operativo, en servizo, no 2020 ou no 2021.
A presidenta do ADIF indicou que se está instalando na liña a Galicia a última tecnoloxía de sinalización e comunicacións, e apuntou ás probas dos trens cos sistemas ERTMS e ASFA como os causantes de certa demora. «Antes as liñas púñanse en servizo en seis meses, agora non», apuntou sobre os cambios na seguridade, apuntando que esas probas tardaban en realizarse o mesmo en España que noutros países europeos.
Esas probas, dixo, «están a ir moi ben» ata Puebla de Sanabria. Cando se acaben as obras do seguinte tramo, empezarase alí tamén con probas. «Non podo dicir os meses que van durar, pero pódense facer unha idea coas outras liñas que estamos a pór en servizo», dixo, aludindo ao caso de Granada, onde mesmo houbo que interromper o servizo ferroviario durante un tempo, coas consecuentes queixas dos usuarios afectados.
