Leva desde os oito anos diante dunha cámara. «Luar» abriulle as portas do gran público en Galicia, e Eurovisión lanzouna á fama en España. Hoxe xa ten sete discos no mercado
22 ago 2019 . Actualizado ás 07:53 h.Sendo unha cría, Lucía Pérez (O Incio, 1985) pasábase o intre convencendo os seus pais para que a levasen a canto concurso musical había. A súa paixón pola música era desbordante. Con oito anos púxose diante do micrófono e as cámaras no Téquele Téquele infantil da TVG cantando temas do Xabarín Club, e máis tarde virían o Tequelexow, o Festival do Landro... e Luar.
Mentres os seus amigos íanse a xogar ao fútbol, con 17 anos ela marchábase a cantar a un estudio. «Para min era normal cantar na tele», conta entre risos. O mesmo que recibir de mans de Manolo Escobar o trofeo de gañadora da primeira edición da mítica Canteira de cantareiros. Ese foi o último concurso no que participou. Arrincaba a súa carreira musical.
«Daquela o concurso non tiña premio económico, así que meus pais dixéronme se quería gravar unhas cancións, que eles me regalaban facer un disco», lembra. A distribuidora vendía o seu traballo en centros comerciais, pero a maior parte dos cedés despachounos a súa familia. «Miña nai, que era carteira, ía ofrecendo o meu disco. “Queredes o disco de Lucía? É marabilloso”. Hoxe emociónome ao contalo. A miña parella e a miña familia son o meu piar».
Desde aqueles primeiros pasos han transcorrido máis de tres lustros, outros seis discos e moitos concertos e actuacións. Quince soles, o seu último traballo musical, recolle quince temas que representan momentos especiais da súa vida e é un dos seus tesouros. Aínda que agora se tomou uns días de descanso en Portugal -onde ademais gravou un tema con Zé Amaro-, a súa axenda está repleta: concertos, actuacións e o seu papel como xuíza no programa da TVG A liga dos cantantes extraordinarios.
«Hai momentos nos que o traballo é menos visible, pero non para. Cando non estás con actuacións tes que estar preparando outras cousas», explica a solista, que encaixa á perfección na definición de polifacética.
Entre aqueles primeiros temas de Rocío Dúrcal que cantaba en Luar e o seu sétimo disco hai moita faragulla na vida de Lucía. Participou dúas veces no Festival de Viña do Mar, fixo xiras por Sudamérica e representou a España en Eurovisión . Un bum inesquecible. «Nunca imaxinara poder ir. Gocei moitísimo. A canción era das que máis cantaban os eurofans, viaxei por toda Europa e o público era marabilloso», lembra.
Pero mesmo no medio de toda a marabunta Lucía, co seu sorriso perenne, sacou tempo para titularse en Maxisterio e Pedagoxía Musical. «Foi duro, pero meus pais sempre tiveron claro que era importante que estudase. Ademais, esta profesión é de moitos altos e baixos e nun momento dado véxome perfectamente de profesora de música».
Fun
Primeira gañadora do concurso de Luar «Canteira de Cantareiros» e participei en Eurovisión
Son
Cantante e xurado nun concurso musical da TVG