A directora de Turismo de Galicia, Nava Castro, presentou as novidades de que implanta o decreto esta mañá en Valdoviño
21 ago 2019 . Actualizado ás 19:43 h.Os máis de 120 cámpings turísticos da comunidade serán regulados por unha nova normativa. A directora de Turismo, NavaCastro , explicou as novidades que implanta o decreto esta mañá durante a súa visita ao Cámping de Valdoviño, onde acudiu acompañada do presidente da Asociación Galega de Cámpings, Delfín Fidalgo, e o responsable de Abanca Galicia Classic Surf Pro , Marcos Rodríguez.
Entre as principais novidades, Castro destacou a nova clasificación por estrelas, como se fai cos hoteis, deste tipo de aloxamentos. Así, a normativa adáptase á regulación implantada noutras comunidades autónomas e países da Unión Europea. O decreto establece uns criterios de clasificación en función dos equipamentos e servizos ofertados. De forma que os cámpings con máis estrelas deberán contar con extras como piscina exterior, supermercado ou gardería, por exemplo. Ademais, estes requisitos fixaranse en función do número de usuarios e non de parcelas, como viñan facendo as regulacións anteriores.
Outras das novidades presentadas por Nava Castro é a posibilidade de que os cámpings se especialicen en tres áreas. Ata o momento, os aloxamentos podían obter o distintivo de turismo verde se cumprían unha serie de requisitos. Agora súmanse dúas novas categorías: cámping de turismo temático, cando as súas instalacións e servizos correspóndanse cun tema, como o deporte; e cámping exclusivo para caravanas ou autocaravanas, onde estará prohibido acceder con tenda de campaña.
A normativa tamén permite que as instalacións estables destes recintos, como cabanas ou bungalós, poidan ser explotadas a través de intermediarios como os turoperadores. Nestes casos, a persoa titular do cámping será o responsable do cumprimento das condicións establecidas.
Nava Castro destacou que o novo regulamento é froito do diálogo co sector, que se consolida na comunidade con máis de 120 establecementos e máis de 34.000 prazas. O turismo de cámping representa xa un 9,3% da demanda turística en Galicia e este ano crece a un ritmo do 33% en número de viaxeiros.