A Avogacía do Estado cre que Franco falseou o título co que inscribiu ao seu nome o pazo de Meirás

Na demanda presentada no Xulgado de Primeira Instancia e Instrución número 1 da Coruña, a Avogacía do Estado considera que a compravenda do pazo de Meirás foi ficticia e permitiu a Franco inscribir ao seu nome o inmoble no Rexistro da Propiedade. Ese documento, achado nas súas investigacións pola Avogacía, demostraría que a compra do pazo realizada en 1941 foi fraudulenta porque hai un documento anterior, de 1938, no que xa se vendeu o pazo. É dicir, o Estado considera que o inmoble se vendeu dúas veces por parte da mesma persoa, Manuela Esteban Collantes, viúva do fillo de Emilia Pardo Bazán. Unha, en 1938 á Junta prol Pazo do Caudillo, formada polo gobernado civil e varios alcaldes da provincia da Coruña, e outra, en 1941, aínda que esta vez a venda si se realizou a nome de Francisco Franco. A primeira venda fíxose por un prezo de máis de 400.000 pesetas, mentres que na segunda o ditador pagou moito menos: 85.000 pesetas. 

O achado dese documento foi clave na presentación desta demanda por parte do Estado contra a familia Franco pola compra do pazo de Meirás. De feito, o estudo xurídico realizado polos avogados do Estado encargados da investigación considera que ese documento demostra que Francisco Franco falseou o título co que inscribiu o pazo ao seu nome no Rexistro da Propiedade.

Outro aspecto que se ten en conta na demanda, e que se engadiría á propia falsidade do documento de compravenda, é o mantemento do pazo con fondos públicos, segundo fontes da Moncloa, informa Fran Balado desde a Redacción de La Voz en Madrid. 

Feijoo di que a Xunta estuda presentarse

Aínda que pola mañá Feijoo vía dificultades que a Xunta se presentase no proceso iniciado pola Avogacía do Estado, a última hora da tarde dixo que, nunha primeira avaliación, os servizos xurídicos autonómicos viron posible que a Xunta se presente no proceso para recuperar a propiedade pública do pazo de Meirás, informa Juan Capeáns. «Se se confirma esta valoración inicial, farémolo», engadiu o presidente da Xunta, que indicou: «Estamos satisfeitos de que a Avogacía do Estado concorde cos criterios xurídicos da Xunta e coa vontade unánime expresada no Parlamento de Galicia».

---

---