En Marea e os escindidos, separados no Parlamento galego por un muro de pladur
GALICIA
A ruptura de En Marea obrigou a buscar un novo despacho no Parlamento para o Grupo Mixto. Farase dividindo o actual en dous
26 jun 2019 . Actualizado ás 11:36 h.Cando a deputada ourensá Carmen Iglesias , autoproclamada «a vermella de sempre», abandonou a coalición de AGE na lexislatura pasada e precipitou a creación do Grupo Mixto, ao Parlamento galego xurdiulle un problema. Onde situala? O espazo non abundaba, pero como só era unha persoa habilitáronlle unha salita auxiliar utilizada polos ujieres.
A ruptura de En Marea ten algunha complicación engadida. No Grupo Mixto habería que situar non a un, senón a catro deputados, así como aos seus asistentes e colaboradores. A papeleta non se pode resolver habilitando unha sala auxiliar ou remodelando o cuarto das escobas. É necesario un espazo máis amplo, así que a Mesa do Parlamento cre ter dado coa solución, que consiste en parcelar con paredes de pladur as dependencias de En Marea como quen levanta un muro de Berlín para dividir as dúas Alemanias.
No seu día, En Marea exhibiu o músculo dos 14 deputados obtidos no 2016 para desafiuzar ao BNG, con só seis escanos, das oficinas que ocupara durante dúas décadas. En Marea, ou mellor dito as dúas faccións xurdidas da ruptura, seguirán ocupando o mesmo espazo, un dúplex, pero divididos por un muro de pladur. Cada un terá a súa propia entrada para evitar os tropezos. A idea está en marcha e as obras arrincarán coas vacacións parlamentarias do período estival.
