O corredor mortal que vertebra o sur de Lugo e outras noticias

César Rodríguez Pérez
C. Rodríguez

GALICIA

ALBERTO LÓPEZ

A renuncia de Borrell e a incerteza política sobre a investidura. O que debes saber deste mércores

26 jun 2019 . Actualizado ás 22:10 h.

Remata o día informado con esta selección de noticias.

En portada

Dispárase a «incerteza política» ao redor da investidura de Pedro Sánchez. E multiplícanse os sinais que indican que esta pode producirse á volta do verán. O ministro de Exteriores, Josep Borrell, que foi cabeza de lista do PSOE nas eleccións europeas, renunciou ao seu escano en Bruxelas para poder seguir no Executivo.

Cando un Goberno está en funcións non pode incorporar novos membros. Se sae un ministro, non entra outro. E as negociacións para formar un novo Executivo non parecen moi encarriladas. O socio preferente do PSOE, Podemos, insiste nunha coalición que non aceptan os socialistas. E presionan publicamente. A número dous do partido morado, Irene Montero, dixo que Sánchez lles había comunicado que prefería «o apoio da dereita». Iso logo foi desmentido pola socialista Adriana Lastra.

Exclusivo para subscritores

Aquí están os pisos máis caros de Galicia A maioría destes inmobles de luxo están nas zonas exclusivas das cidades. Dámosche os detalles de cincuenta destas vivendas non aptas para todos os petos.

Como nos pode afectar o radón en casa? España leva ano e medio de atraso no cumprimento da directiva europea para o control dun gas radioactivo de orixe natural que supón a segunda causa de cancro de pulmón.

Hoxe en La Voz

O corredor mortal que vertebra o sur de Lugo. O viario que vertebra o sur de Lugo segue cobrándose vidas. En cinco anos xa son doce os falecidos na estrada que comunica Nadela e a cidade do Cabe. Explicámosche aquí os factores de risco que o converten en moi perigoso.

Denuncian a un sicario por non consumar o asasinato encargado. Moitas veces a realidade parece superar á ficción. En Madrid foron detidas unha nai e unha filla por encargar o asasinato dun home e logo denunciar ao sicario en comisaria por non cumprir o pactado. O caso ten faragulla. A muller que contratou ao suposto executor facíase pasar por alto cargo do CNI. E pediulle que logo vendese os órganos da vítima, que fora parella da nai.

Percorre a AP-9 cun camión 300 metros marcha atrás e en zig zag. A Garda Civil sorprendeu a un camioneiro de Allariz executando unha manobra temeraria na autoestrada AP-9 ao seu paso por Teo. O home foi pillado cando circulaba marcha atrás cun vehículo de gran tonelaxe nun tramo de semicurva.

Os restos humanos dun vigués apareceron en Cantabria. En 1994 foi denunciada a desaparición dun mozo en Vigo. Ese mesmo ano apareceron uns restos humanos nunha praia cántabra, posiblemente trasladados polas correntes. Tras moito tempo de investigación e a incorporación de novas tecnoloxías, a Garda Civil desvelou que o pasado mes de maio puido confirmar coa nai e o irmán que se trataba del.

A baixa médica do controvertido líder andaluz de Vox. A sentenza do Supremo sobre a Manda chegou acompañada das polémicas valoracións do líder de Vox en Andalucía. Francisco Serrano chegou a dicir que «ata un gatillazo podería rematar co impotente en prisión» ou que «a relación máis segura entre un home e unha muller será unicamente a través da prostitución». Os seus excesos verbais xeraron unha gran controversia e foron mesmo descualificadas pola dirección do seu partido. Cinco días despois, colleuse a «baixa médica» e bota a culpa da mensaxe a un colaborador, pero négase a rectificar.

Ao detalle

Igual cómprasche unha lata de atún, tómasche un café de pota, pides tabaco ou che selan a lotería. Mesmo sábados e domingos. Por iso a este establecemento ourensán coñéceselle desde hai tempo como o corte inglés. E o martes repartiu un millón de euros. E todo eran sorrisos.

Tamén para ti

Vasilios Lampropoulos, primeira fichaxe do Dépor para a campaña 2019-20. O central grego, de 29 anos, asinou co club coruñés para as próximas dúas tempadas.