A decisión obriga a revisar o financiamento e as cotas de iniciativas dos partidos
25 jun 2019 . Actualizado ás 09:50 h.A Mesa do Parlamento de Galicia, o máximo órgano de goberno da Cámara, aceptou na súa reunión deste luns darlle trámite á petición rexistrada por Luís Villares e outros tres deputados de En Marea para habilitar de novo o Grupo Mixto, constituído xa na lexislatura pasada tras a ruptura producida no seo de Alternativa Galega de Esquerda (AGE), a coalición que precedeu a En Marea. A decisión será publicada o xoves no BOPG, o boletín oficial do Parlamento, e pode vir rodeada de polémica, pois obrigará a revisar á baixa os tempos de intervención, o financiamento ou as cotas de iniciativas de cada formación. O primeiro prexudicado vai ser o BNG, así como as dúas faccións xurdidas da antiga formación rupturista, pois van perder o dereito de poder interpelar ao presidente da Xunta en cada sesión de control.
O presidente da Cámara, Miguel Santalices, tomarase uns días para consultar aos servizos xurídicos e analizar como reconfigurar o Parlamento e as súas regras de funcionamento para canalizar a actividade de cinco grupos políticos onde ata agora había catro. Unha forma de facelo consistiría en ampliar en polo menos un 20 % o tempo de duración das comisións, os plenos ou as roldas de preguntas a Feijoo para satisfacer a todos os grupos, pero é unha formulación que na xefatura do casarón do Hórreo descartaron.
Santalices deberá facer unha proposta que vai ser como a cuadratura do círculo. Que cinco grupos políticos fagan case o mesmo que facían catro, sen empregar máis tempo nin tampouco máis recursos públicos, pois a presidencia considera que a cidadanía non entendería que a escisión de En Marea comporte un sobrecusto orzamentario.
Os portavoces dos grupos apresuráronse onte a facer unha primeira valoración do que se aveciña. Por parte do PP, Pedro Puy pediu que «non se faga responsables» ao resto dos partidos da «distorsión» que provocará a quebra de En Marea. Desde o PSdeG, en cambio, Leiceaga ve a ruptura de En Marea como unha oportunidade para «reforzar a idea e a mensaxe» de que os socialistas son a alternativa ao PP en Galicia.
Os dous grupos máis grandes, xa que logo, aspiran a conservar o seu status coa creación do Grupo Mixto, pero os tres minoritarios -BNG, con 6 deputados; En Común Podemos, con 10; e o Mixto, con 4- van ver reequilibrados á baixa tanto os seus tempos de intervención, como o seu peso nas comisións ou a súa cota para debater iniciativas.
Luís Villares bótase ao carón e renuncia a manter o último cara a cara con Feijoo
En Marea, con 14 deputados no Parlamento galego, é un grupo roto en dúas porcións, pero no pleno que arrinca este martes seguirá operando aínda de xeito unitario, pois a constitución do Grupo Mixto aínda levará uns días. Sobre o papel, Luís Villares aínda podería exercer como portavoz do grupo, pero á vista dos acontecementos preferiu facerse ao carón e renunciar a manter o último cara a cara con Feijoo como portavoz de En Marea.
A pregunta rexistrada por Villares para a sesión de control ao presidente da Xunta, que terá lugar mañá, versaba sobre o crecemento da economía galega desde o 2009 e as súas consecuencias. O propio Villares delegou nos seus viceportavoces -Antón Sánchez (Anova) e Carmen Santos (Podemos)- a posibilidade de que un dos dous puidese tomar a vez e asumir a pregunta a Feijoo, pero ambos declinaron o ofrecemento, así que o portavoz do grupo solicitou a súa retirada.
Compás de espera
Desde En Marea explican que, dada a situación de ruptura do grupo, non tería sentido que Luís Villares actuase no cara a cara co presidente de Xunta como portavoz dunha formación que non existe. Así que tanto o sector de Villares , que se irá ao Grupo Mixto, como os oito deputados agrupados ao redor de En Común, a facción apoiada por Podemos, Esquerda Unida, parte de Anova e algúns independentes, agardarán a que o presidente do Parlamento, Miguel Santalices, faga a súa proposta para a repartición de tempos, de espazos e de cotas de iniciativas a cada grupo para decidir os nomes dos futuros portavoces.
Agora ben, a ruptura definitiva de En Marea vaise retardar de forma ficticia para poder amarrar hoxe un cargo de senador autonómico, pois se se materializase xa a escisión ese posto corresponderíalle ao PSOE.
