Nova liña de axudas aos municipios de menos de 50.000 habitantes para que rehabiliten o seu patrimonio
GALICIA
As axudas libéranse pouco despois da entrada en vigor da nova Lei de Rehabilitación
25 jun 2019 . Actualizado ás 10:30 h.A Xunta está decidida a aplicar a nova Lei de Rehabilitación e a axudar aos municipios a que comecen a rehabilitar o seu patrimonio. Así, a Consellería de Medio Ambiente, Territorio e Vivenda puxo a disposición dos concellos de menos de 50.000 habitantes unha partida de 6,4 millóns de euros para financiar, a través de préstamos sen intereses, actuacións de rehabilitación e conservación de patrimonio construído, para rexeneración urbana e para a adquisición de inmobles para a súa posterior rehabilitación.
O Diario Oficial de Galicia publicou onte a resolución da convocatoria, cuxo prazo de presentación de solicitudes permanecerá aberto entre hoxe e o 1 de outubro, ou cando se esgote o crédito. O obxectivo deste fondo de cooperación é facilitar que os concellos acometan actuacións de recuperación e posta en valor do patrimonio construído, coa idea de recuperar ámbitos en estado deficiente de conservación como medida de protección deste patrimonio.
Así, o fondo contribuirá a facilitar aos concellos as actuacións subsidiarias de rehabilitación nos casos en que os propietarios das vivendas desatendan as súas obrigacións. Neste caso, a nova normativa vixente permite aos concellos actuar subsidiariamente e despois reclamar aos propietarios o importe das actuacións realizadas, un dos aspectos que poden ser máis útiles da nova Lei de Rehabilitación, na que tamén se prevé o cobro de canon para aqueles propietarios que se neguen a rehabilitar os seus inmobles.
A cargo do fondo poderán financiarse actuacións promovidas polos concellos no desenvolvemento das competencias que lles atribúe a lexislación urbanística en relación cos deberes de conservación e rehabilitación, actuacións de rehabilitación e rexeneración derivadas das propias políticas municipais e adquisición de inmobles para a súa rehabilitación.