Oito dispositivos aéreos sobrevoan as estradas españolas durante esrta Semana Santa para detectar retencións e infraccións, aínda que polo momento non servirán para efectuar denuncias
17 abr 2019 . Actualizado ás 20:30 h.A segunda fase da operación saída de Semana Santa xa se puxo en marcha. En España agárdanse máis de nove millóns de desprazamentos (máis dun millón e medio en Galicia) desde hoxe mércores ata o vindeiro luns 22. Ademais do reforzo da vixilancia con axentes da Agrupación de Tráfico da Garda Civil e do persoal operativo dos centros de xestión de tráfico que ten a DXT en distintos puntos de España, un deles en Galicia, neste dispositivo de Semana Santa a Dirección Xeral de Tráfico utilizará oito drones para vixiar a circulación.
Os drones de Tráfico empezaron xa a enviar imaxes do estado das estradas e de infraccións cometidas polos condutores. Responsables da DXT destacaron o funcionamento destes aparellos aéreos porque poden captar incidencias ou accidentes, así como irregularidades ao volante, por exemplo o uso do móbil ou a non utilización dos cintos de seguridade, aínda que ata o momento non poden ser utilizados para impor infraccións. «Están a rematarse de tramitar todos os aspectos a efectos técnicos para que poida realizarse a denuncia con os drones e creo que proximamente teremos noticias respecto diso», dixo a subdirectora adxunta de Circulación da DXT, Ana Isabel Blanco, quen explicou que estes aparellos son «un complemento importante do labor que prestan as patrullas de helicópteros».
Nas estradas galegas non haberá drones durante este dispositivo de Semana Santa, xa que a vixilancia aérea se realizará coa patrulla do helicóptero Pegasus, que ten a súa base en Alvedro e que atende a rede viaria galega e parte de Asturias.
O xefe da Unidade de Medios Aéreos da DXT, Rubén López Segovia, explicou que os drones utilizaranse sobre todo nas estradas convencionais e nos tramos nos que exista concentración de accidentes. «Inicialmente imos destinalos ao control e á xestión do tráfico e en sucesivas fases de desenvolvemento introducirémolos como plataforma de detección de infraccións», precisou López Segovia, quen dixo que os drones de Tráfico poden acadar unha altura de ata 120 metros. «Grazas á potente óptica que embarcan estes sistemas pódese detectar o interior do vehículo perfectamente», asegurou o xefe de Medios Aéreos da DXT.
