Profesores interinos e opositores encomian a cantidade de prazas convocadas e describen a súa vida antes de lograr unha
23 ene 2019 . Actualizado ás 14:00 h.Nun país onde a mobilidade laboral non está aínda tan enraizada como noutros Estados da contorna europea, para moito dos docentes que levan anos tratando de obter unha praza fixa na Administración educativa a nova convocatoria é o primeiro paso dun longo camiño ata acabar cunha vida trashumante que podería prolongarse mesmo ata lograr un destino definitivo despois de ter obtido praza. Para os recentemente graduados é unha oportunidade de entrar na roda. Estes son os testemuños dalgúns profesores ou aspirantes para os que onte se abriu unha porta.
Helena Rodil
Está facendo unha substitución por xubilación. Tras acabar os seus estudos de Dereito Económico, Helena Rodil optou por dar o salto á docencia. Desde o 2007 traballou como profesora interina en distintos centros de Navarra e Castela e León. Fai catro anos regresou ao seu Lugo natal, onde agora está realizando unha substitución por xubilación no CIFP As Mercedes. Aí dá clase de Comercio nos ciclos de Transporte e Loxística e Mercadotecnia e Publicidade. A súa experiencia de máis de dez anos saltando de destino en destino lévaa a concluír que a vida dun profesor interino «é complicada porque non sabes onde vas vivir ata días antes. As prazas saen en setembro e dous días despois tes que empezar a dar clase». Pero tamén recoñece que cambia moito cando non tes cargas familiares respecto de cando xa tes fillos: «Cando estaba solteira non me importaba, pero cos nenos teño que acotar a Lugo para poder conciliar». Por esa razón este curso perdeu 15 días de traballo ao ter que renunciar a unha interinidade porque non era no concello lucense. Sobre a nova convocatoria di «estar alucinando», porque non contaba con que sacasen tantas prazas. «Estoume plantexando cambiar de especialidade. Ao facer Dereito Económico podo presentarme a Economía, Administración de Empresas, Formación e Orientación Laboral (FOL) ou Procesos de Xestión Administrativa», explica.
SABELA CACHEIRO
Opositora a Pedagoxía Terapéutica. Sabela preséntase a unha das especialidades que ofertan máis prazas. «Este ano son 50 prazas máis. Iso anima e motívache porque o ano pasado eran poquísimas, pero tamén pode ter un lado malo. E é que ás veces se produce un efecto chamada e hai máis xente doutras especialidades que se apunta a esta por probar, co que ao final volvería haber moitos candidatos para cada posto», explica. Ela compaxina a preparación dos exames cun traballo por horas nunha cadea de comida rápida e con dar clases particulares a nenos. Faino por hixiene mental, «unhas horas dedicándoche a outra cousa sérvenche para evadirche» e, de paso, é unha axuda para os gastos que supón preparar a oposición a través dunha academia. Este será o terceiro ano que se presente e, aínda que animada, pon o dedo na chaga dunha certa subxectividade: «Cada cidade ten o seu tribunal coas súas propias ideas, pero daquela as listas son xerais e é doado ver que nuns tribunais hai máis aprobados que en outros», quéixase.
«Cando tes unha familia, viaxas... non podes competir en igualdade con quen só estuda»
ramón fernández
Interino no IES de Mondoñedo. Ramón é da Mariña. Tras ter traballado no Instituto Nacional de Emprego (Inem), no 2010 presentouse a unha oferta de emprego público restrinxido para xente que estaba a traballar. Desde fai seis anos, ha ir combinando postos de interino con outros de substituto en diferentes centros. Agora está en Mondoñedo dando clase de Formación e Orientación Laboral. «No exame quedei a tres décimas da praza», lembra. E fala dos problemas para conciliar, non só a vida laboral e familiar. Tamén para sacar tempo para estudar. «Cando tes unha familia, tes que viaxar... non podes competir en igualdade con alguén que está dedicado a preparar o exame». Despois de ter traballado noutras administracións, destaca a alternativa que dá a Consellería de Educación de poder solicitar unha permuta «para poder intercambiar destinos. Está moi ben porque noutros departamentos da Administración non funciona».
Máis de 1.400 prazas en sanidade e 2175 para a administración xeral
Tras os anos nos que a Lei de Estabilidade Orzamentaria obrigou ás administracións a apertarse o cinto restrinxindo ao máximo a convocatoria de postos públicos, agora toca volver afrouxalo. O pasado mes de novembro, a Xunta avanzou a convocatoria de 3.636 prazas para postos na administración xeral e sanidade. Máis aló das de educación, detalladas onte aos sindicatos pola consellería, estas son outras das convocatorias públicas de emprego correspondentes ao 2018.
Sergas
Os 1.461 postos convocados inclúen o cento por cento da taxa de reposición. Diplomados sanitarios e de formación profesional poderán acceder a 288 de técnicos de coidados auxiliares de enfermería, 160 de técnicos superiores, 86 de enfermeiros especialistas, 65 de fisioterapeutas, 51 de técnicos de farmacia, cinco de terapeutas ocupacionais e catro de logopedas. Os licenciados sanitarios poden optar a 331 postos de facultativos especialistas, 65 de médicos de urxencias en hospitais, 58 de pediatras de primaria, 54 de médicos de familia e catro para odontólogos de atención primaria. Para xestión e servizos hai 168 prazas de enfermeiros especialistas, 35 de fisioterapeutas, 18 de técnicos de farmacia e 8 de terapeutas ocupacionais.
Administración Xeral
A oferta é de 2.175 postos repartidos entre servizos xerais, servizos sociais, loita contra a fraude fiscal e asesoramento xurídico. Moitos tamén están dirixidos a consolidar o emprego eventual.