O pai de Diana Quer: «Onde estaban as feministas cando apareceu o cadáver da miña filla?»
GALICIA
Numerosas respostas lémbranlle as mobilizacións cidadás tras a desaparición e morte da nova
17 ene 2019 . Actualizado ás 18:57 h.Juan Carlos Quer sementou a polémica cunha mensaxe lanzada na súa conta de Twitter no que carga contra as manifestacións feministas celebradas estes días en contra das propostas políticas de Vox . O pai de Diana Quer quéixase de que, na súa opinión, o feminismo non se mobilizou ante o caso da súa filla, cuxo cadáver foi achado en 2017 nunha nave abandonada de Rianxo tras case de 500 días de procura. «O movemento feminista mobilízase en España para defender os dereitos da muller. Pregúntome onde estaban as feministas cando apareceu o cadáver da miña filla Diana Quer, tras ser violada e asasinada. Buscan vengaza, como me dixo ao meu Pablo Iglesias ??. Coherencia cero.» reza o chío.
As reaccións non se fixeron agardar. Moitos usuarios da rede social lembraron a Quer as numerosas mobilizacións cidadás que tiveron lugar por mor da desaparición da súa filla e tamén tras a confirmación da súa morte a mans de José Enrique Abuín, 'o Chicle'.
Varias mensaxes pediron a Quer que non «politice» o asasinato da súa filla e afeáronlle «usar» o tráxico crime para cargar contra o movemento feminista e «atacar a quen defenden os dereitos das mulleres».
O chío de Juan Carlos Quer tamén obtivo algúns apoios de usuarios que censuraron ás feministas por, din, «vivir do conto».
O propio Quer rechouchiou a mensaxe de apoio do Portavoz Partido Popular en Fuenlabrada, Sergio López.