Os veciños recoñecen que «diluviou», pero denuncian que «nin limpan o río nin o deixan limpar»
GALICIA
Aseguran que levan moitos anos denunciando ante organismos oficiais o descoido na canle
20 novs 2018 . Actualizado ás 05:00 h.«A chuvia que caeu foi unha catástrofe, pero isto non sucedería se o leito do río estivese limpo. Unha muller morreu na súa casa pola nosa neglixencia. Diluviou, pero nin limpan o río nin o deixan limpar». Con esta contundencia expresouse onte Orlando Expósito, un dos veciños de Xunqueira que aseguran que levan moitos anos denunciando ante organismos oficiais como Augas de Galicia a falta de limpeza da canle que na noite do domingo desbordouse en Viveiro, provocando un regueiro de incidencias e a morte dunha muller de 82 anos, que pereceu no interior da súa vivenda ao non poder escapar da auga. «Estamos cansos de chamar e que non nos fagan nin caso. Se non se coidan os ríos, pasan estas cousas», manifestou.
Do mesmo xeito que Expósito, que onte se afanaba en liquidar as desfeitas provocadas pola tromba no exterior da súa casa, outros moitos recoñecen que o fenómeno meteorolóxico rexistrado foi excepcional, pero que tamén influíu o factor humano. «O causante disto é a auga, diso non hai dúbida, está claro. Pero hai cousas que se poden facer para evitar traxedias humanas así», apuntou Ramón, propietario dunha empresa situada en Xunqueira que comercializa maquinaria agrícola, que apenas se viu afectada por estar situada varios metros sobre o nivel do río.
Denuncias ante o Seprona
Outro veciño que sufriu as consecuencias da tromba foi Roberto Yáñez, que asegura ter denunciado o mal estado do río Xunqueira ante o Seprona e a Consellería de Medio Ambiente nos últimos meses. «No verán tallaron un monte río arriba e deixaron moitas árbores tiradas amais . Denunciei a situación e viñeron ver como estaba todo, pero ninguén fixo nada. E hoxe [por onte] parte desa maleza e desas árbores son os que están aquí, os que arrastrou a corrente», indicou mostrando a ponte no que, segundo as primeiras hipóteses, se había formando o dique natural que ao romper provocou a gran inundación que arrasou o barrio. Segundo indicaron distintas fontes, algúns vehículos que estaban estacionados nesta zona foron arrastrados pola corrente centenares de metros, ata acabar encaixados en terreos e vivendas particulares, ou en puntos como A Xunqueira, onde se sitúa o campo da festa.