O presidente do Centro Galego de Bruxelas lamenta a polémica, pero «de ningún xeito» cancela o acto
GALICIA
Palomo sente «rabia» pola polémica xerada en torno ao acto independentista
17 novs 2018 . Actualizado ás 05:00 h.Miguel Palomo é un veterano betanceiro que emigrou cunha maleta de cartón para traballar nas minas belgas e acabou montando unha empresa de pinturas. É o histórico presidente do Centro Galego de Bruxelas, que está a piques de cumprir corenta anos, e admite que sente «rabia» pola polémica na que se viu envolvido o colectivo ao aceptar como inquilinos no seu espazo cultural, o próximo 8 de decembro, a unha asociación da contorna de Carles Puigdemont que recada fondos para o independentismo catalán a través dun festival. Laméntao porque cre que se está ensuciando o traballo de catro décadas «de irmandade con Galicia, por suposto, e tamén con Bélxica ».
O malestar institucional transmitiullo xa directamente a Xunta, e chegoulle tamén a través de decenas de mensaxes, moitos desairados e con termos «maleducados». Sostén que tamén recibiu apoio de «xente da cultura», sobre todo de Bélxica, onde o Centro Galego fíxose un oco pola recuperación do local onde se atopa a sala A Tentation e pola súa dinámica axenda. Con todo, «de ningún xeito» vai suspender o recital separatista, «porque se trata dun acordo comercial e poderían denunciarnos». Así o van a difundir nun comunicado que pactarán os socios de referencia na próxima xunta directiva, prevista para a semana que vén.
Palomo recoñece que, noutras circunstancias contractuais ou para próximas ocasións, pensaríase» dar acubillo a este festival no que participará Valtònyc, fuxido da Xustiza española, e teme que poida significar unha ruptura na colaboración coa Xunta, que no último ano achegou 15.000 euros para as actividades vinculadas á promoción de Galicia. «É un 1,5 % do noso orzamento; se deciden romper buscaremos axudas en Bélxica», di con pesar.