A filla maior do home abatido pola policía por erro nun control decatouse da morte por redes sociais
22 sep 2018 . Actualizado ás 05:00 h.«Eu quero saber que aconteceu. Que se descubra por que fixeron iso con el. Non merecía iso. Era una persoa boa, un pai de familia, un home correcto». Así de contundente mostrouse onte na televisión brasileira Globo-1 a exmuller de Marcio Pérez Santana, o consultor caldelán de 41 anos abatido por erro pola policía nun control na cidade de Baía. Nunha emotiva intervención na televisión G-1, esta muller lamentou o sucedido, ao que aínda non daba crédito. «A peor cousa que eu fixen na miña vida foi dar esa noticia ás miñas fillas», engadiu. A traxedia para as menores, de 13 e 9 anos, aínda foi maior porque esta fin de semana o pontevedrés ía pasar a fin de semana con elas. Segundo relata G-1, a filla maior decatouse do que pasara ao lelo en redes sociais, antes de que unha tía puidese impedilo mentres agardaba a chegada a casa da nai para dicirllo.
A prensa da cidade, chea de noticias delituosas e crimes, parece sorprendida pola dureza do ocorrido o pasado mércores no barrio de Costa Azul de Baía. A noticia da morte de Marcio encheu titulares e minutos de informativos. A presión social obrigou á policía brasileira a abrir unha investigación interna, para intentar aclarar que pasara. Os medios informan de que os dous axentes implicados estaban apartados da rúa e prestaron onte declaración. O Consulado Xeral de España en Baía, segundo explicaron fontes do Ministerio de Asuntos Exteriores, tamén remitiu unha carta ás autoridades do país suramericano reclamando «un estreito seguimento do asunto».
En Ponte Caldelas, o municipio de onde era natural Marcio, o Concello decretou dous días de loito e izou as bandeiras a media hasta. Na vivenda familiar en Anceu, unha gran dor. A nai está xa no Brasil para repatriar o cadáver, que será enterrado en España. O alcalde caldelán, Andrés Díaz, confirmou que a familia o quere enterrar en Galicia e mediou coa Subdelegación do Goberno para que se axilicen os trámites.
O relato dos feitos segue sendo confuso, pendente das conclusións da investigación. Segundo indican medios como o G-1 ou O Correio dá Bahia, aínda non se sabe que facía a patrulla que protagonizou o tráxico incidente. Ao parecer, e segundo esas versións, eses axentes pertencen a un corpo policial que ten a súa base a 9 ou 10 quilómetros do lugar e non lles correspondía vixiar esta contorna. Esta é unha das incógnitas, así como por que o coche patrulla non tiña acendidas as luces nin o giroplex, unha apreciación na que o ditame da prensa brasileira, en base aos testemuños recolleitos, é unánime.
Moitos detalles por aclarar
A exmuller explicou que Marcio había ir a buscar a unha amiga e que pararon a comprar temaki -unha comida brasileira-, e seguiron a súa ruta con normalidade ata estar xa moi preto da vivenda e, segundo algúns medios, a piques de entrar no garaxe. A Tarde de Bahia precisa que é nese momento cando viron un coche que lles apareceu por detrás. A narración da prensa de Baía sostén que os axentes lles ordenaron saír a berros do vehículo e que empezaron a disparar. A hipótese xeral é que Marcio non crese que fosen policías, senón asaltantes, e que por iso se deu á fuga. Os axentes dispararon ao coche varias veces ao ver que se escapaba e unha das balas, atravesando o repousacabezas, deulle de cheo. O coche, co condutor impedido, chocou cunha palmeira nunha avenida.
Segundo a explicación da exmuller do caldelán na televisión, o persoal sanitario dixo, en base ao relato da amiga que ía con el, que cando chegaron a asistir ao pontevedrés os axentes informáronlles de que era un accidente, e que foi un médico quen percibiu o tiro na caluga. Este é un dos puntos cruciais que deberá aclarar a investigación en marcha.
A xornalista Giana Mattiazo explicou durante a emisión do informativo de G-1 que o falecido tiña planeado retornar a España.