Almuíña ve inxustas e inoportunas as críticas dos colexios médicos

Asegura que a Consellería si tomou medidas para reter aos facultativos

.

santiago / a voz

Con pequenos rozamentos ou chamadas de atención, os colexios médicos de Galicia mantiveron sempre unha relación cordial coa Consellería de Sanidade. E sobre todo esta última gardouse moito de criticar calquera actuación ou comentario das entidades colexiais. Pero este acordo rompeuse co comunicado que o Consello Galego de Colexios Médicos enviou días despois do falecemento dun paciente no PAC da Estrada, no que se acusaba ao Sergas de non tomar as medidas necesarias para evitar a escaseza de médicos e para fidelizar e atraer especialistas.

O conselleiro de Sanidade, Vázquez Almuíña, afirmou sentirse «sorprendido» por unhas afirmacións que non son certas «porque se fixeron cousas, aumentouse a idade de xubilación, as prazas de residencia, creáronse especialidades de enfermería de familia e pediatría e fíxose un plan de estabilidade que reducirá a eventualidade ao 5 % no 2020». Para Almuíña as críticas son inxustas e inoportunas. Inadecuadas fundamentalmente polo momento no que se producen, tras o falecemento dun paciente, «o que me parece inoportuno».

O conselleiro manifestou tamén as súas condolencias á familia da vítima e recordou que ese día estaba planificado un reforzo no PAC, pero por un evento sobrevindo a persoa asignada non puido acudir e foi imposible atopar un substituto, algo que si se conseguiu o domingo. «Xulgar aos equipos e á organización por un falecemento é inxusto», indicou Vázquez Almuíña.

Reforma da primaria

A morte dun enfermo reavivou o debate sobre a reforma da atención primaria, pero esta leva meses, por non dicir anos, sobrevoando a Administración. No verán, coa falta de pediatras e médicos de familia, o debate acentúase, e o Sergas asegura que mantén conversacións con colectivos profesionais, colexios médicos e de enfermería e sociedades para mellorar o primeiro nivel asistencial, que é ademais o máis próximo á cidadanía.

Por iso é polo que estea encima da mesa dentro destas conversacións a reorganización dos PAC, como apunta Almuíña: «Debemos razoar en función dos medios que temos. Cando se critica que nun PAC hai só un equipo talvez é máis xusto concentrar, aínda que sexa a unha distancia maior, a dúas ou tres equipos, polo que non xurdiría un problema como o do fin de semana aínda que se tivese que desprazar un equipo por unha urxencia», explica. Almuíña recorda que Galicia foi unha das comunidades que impulsou a creación a nivel estatal dun grupo de traballo para paliar o déficit de médicos na sanidade, e de feito lamenta que o último Consello Interterritorial do Goberno de Sánchez non incluíse este tema na orde do día, «que para nós é a prioridade absoluta».

Entre as medidas que se valoraron está a posibilidade de facer contratos estables aos médicos que terminan a residencia -algo que reclaman os colexios profesionais- aínda que deban cambiar de destino, e que segundo o Sergas non é posible a nivel legal. Si o Goberno central adapta a normativa, a Xunta, asegura o conselleiro, implantaraos.

Déficit ou exceso

Á queixa pola falta de profesionais sumouse onte o decano de Medicina da USC, Julián Álvarez Escudero , pero precisamente por todo o contrario. Escudero asegura que non faltan médicos, senón ao revés, e o único que hai son carencias de determinados especialistas en momentos puntuais. Escudero apuntou máis a un problema de organización e expuxo a posibilidade de reorganizar o modelo asistencial. E como exemplo recordou que das facultades saen entre 7.000 e 7.500 graduados e hai só seis mil prazas mir, polo que hai máis de mil médicos que non se forman «e iso é unha traxedia».

Coñece toda a nosa oferta de newsletters

Creamos para ti unha selección de contidos para que os recibas comodamente no teu correo electrónico. Descobre o noso novo servizo.

Votación
15 votos
Comentarios

Almuíña ve inxustas e inoportunas as críticas dos colexios médicos