Caballero pide un pacto de revitalización demográfica ante o Comité das Rexións

O secretario xeral do PSdeG-PSOE, Gonzalo Caballero, acompañado polo eurodeputado galego José Blanco, mantivo onte unha reunión en Bruxelas co presidente do Comité das Rexións (CdR) da Unión Europea, Karl-Heinz Lambertz, ao que trasladou o profundo «compoñente europeísta» dunha comunidade periférica como Galicia, coñecida en toda Europa polo fenómeno do Camiño de Santiago, e ante quen reivindicou a necesidade de impulsar un gran pacto social pola revitalización demográfica das rexións que están sufrindo o despoboamento co obxectivo de influír de xeito transversal nas políticas comunitarias. O que expón o líder socialista galego é «unha gran alianza» de rexións europeas que, como a galega, afrontan problemas no ámbito demográfico, con todas as consecuencias económicas e sociais que iso trae.

O líder socialista constatou na súa viaxe a Bruxelas que Galicia está «ausente» da axenda europea Co encontro con Lambertz, un belga representante da comunidade germanófona que pertence ao Partido Socialista, Caballero pecha o periplo de tres días durante os cales mantivo diversos contactos con diversas autoridades europeas e españolas en Madrid e en Bruxelas. «Foi unha xuntanza distendida, fructífera e con moita proximidade», valorou o líder do PSdeG sobre a súa charla co presidente do CdR, na que ambos constataron as expectativas «europeístas» que se abren co xiro político en España e a chegada de Pedro Sánchez á Moncloa.

Gonzalo Caballero trasladou a Karl-Heinz Lambertz a problemática puntual que ten Galicia, que ten unha poboación moi envellecida e con tendencia a que aumente a súa lonxevidade, en paralelo cunha das taxas de natalidade máis baixas do continente. «Temos que configurar un gran pacto social pola demografía», trasladou o socialista galego ao máximo responsable do CdR, co fin de que esta estratexia marque as políticas de cohesión, de fomento do emprego ou da innovación.

Tras o encontro con Lambertz, o secretario xeral do PSdeG tamén constatou unha «ausencia de Feijoo» das cuestións que ten que ver con Europa. «O presidente da Xunta ten que ter un papel máis activo, máis presente e máis protagonista na Europa das rexións», censurou Caballero, que volveu botar en falta a ausencia da «axenda europea» de Galicia, pois entende que desde a Xunta non se fan propostas nin se intenta influír nas decisións comunitarias.

Caballero tamén incidiu en que o Comité de Rexións debe deixar de ser un órgano eminentemente consultivo e, a medio prazo, debería reforzarse para obter un maior poder decisorio. Deste xeito, as distintas rexións de Europa poderían ter un maior protagonismo.

---

---

---