De forma simultánea temos ventos intensos, alerta laranxa no mar e altas temperaturas, con sensación de bochorno
18 abr 2018 . Actualizado ás 05:00 h.O tempo atmosférico que afecta a Galicia actualmente non ocorre a miúdo. O sol e a calor adoitan vir da man do anticiclón dos Azores pero nesta ocasión foi unha potente borrasca a encargada de despexar o ceo e subir o mercurio. Trátase dun sistema de baixas presións moi profundo e extenso para a época do ano. As súas dimensións e intensidade obrigaron aos servizos meteorolóxicos de Portugal a ter que bautizala como Irene. Neste escenario no que as baixas presións xeran condicións secas e cálidas, danse algunhas situacións peculiares. De forma simultánea temos ventos intensos, alerta laranxa no mar e altas temperaturas, con sensación de bochorno. Os valores máis altos danse ademais no norte Lugo. Onte as máximas superaron os 25 graos. Hoxe aínda notaremos a presenza de Irene no Atlántico con forte ondada e ventos moderados. Despois, a situación tenderá a estabilizarse. A partir do xoves o vento soprará en calma e xa non haberá avisos na costa. Unhas condicións que mesmo poderían inaugurar a tempada de praia. «En principio as temperaturas serían propicias posto que en moitos lugares da comunidade superaranse os 25 graos. Ademais, o vento soprará con pouca intensidade, o que axudará a que a sensación poida ser de calor», explica Juan Taboada, de Meteogalicia .
Só as tormentas poderían embazar a previsión de días solleiros, que se manterá ata a fin de semana. «As tormentas serán probables a partir do xoves pola tarde. A borrasca Irene irase debilitando, pero deixará unha zona de aire frío en altura ao oeste da península Ibérica. A combinación de aire cálido en superficie e frío en altura xera as nubes de evolución e aumenta a probabilidade de que se produzan tormentas», engade Taboada.
Irene podería ser o colofón á tempada tan activa de ciclóns que estiveron afectando á comunidade. «Non é que non vaian chegar novas borrascas, pero xa non deberían ser de tipo invernal. A zona de aire xélido que as estaba alimentando debilitouse. A partir de agora irán predominando máis os anticiclóns», remata o meteorólogo.