A Xunta convoca outra reunión cos sindicatos, pero exclúe máis subidas salariais
GALICIA
A Xunta convocou aos sete sindicatos con representación na Xustiza galega a unha nova reunión que terá lugar o vindeiro luns e na que o Goberno galego quere «seguir avanzando nas negociacións sobre a folga», pero deixando claro que «a oferta económica realizada é definitiva». É dicir, que só acepta debater sobre as outras catro reclamacións dos funcionarios: a equiparación retributiva das substitucións, os descontos nas nóminas cando están de baixa laboral, a consolidación das prazas de reforzo e a creación de novas prazas.
Esa oferta de incremento salarial que a Xunta advirte que é definitiva é de 816 euros máis ao ano para o corpo de auxilio, 912 para o de tramitadores e 1.080 para o de xestores. Os sindicatos, que a tacharon de «ridícula», esixen agora mesmo unha subida lineal por traballador -sexa da categoría que sexa- de 2.700 euros anuais, é dicir, de 225 euros mensuais. O Goberno galego advirte que é «inasumible para as arcas públicas» e que suporía un incremento do 13,3 %.
Asegura a Xunta que, coa mellora proposta, os traballadores galegos situaríanse «moi por riba da media do conxunto das comunidades autónomas», e lembra que a este aumento no complemento autonómico os funcionarios de Xustiza sumarán o que percibirán todos os empregados públicos do Estado, que o Goberno central estima nun 8 %. O lonxe que están as posturas das partes fan pouco probable que o luns se produza un acordo que permita desconvocar o paro, que entraría na súa segunda semana.