O temporal Evi deixa ondas xigantes e esnaquiza o espigón do peirao de Cariño
GALICIA
Unha moza resultou ferida en Ortigueira ao caerlle un tronco amais mentres paseaba
18 ene 2018 . Actualizado ás 11:24 h.Evi trouxo moi malo mar. Tanto que onte se superaron as previsións e houbo ondas de moitos máis de oito metros de altura. Pero ademais dun espectáculo digno de ver, o temporal deixa tamén unha nova ferida en Ortigueira ao caerlle un tronco amais mentres paseaba pola praia de Morouzos e desfeitas no porto de Cariño.
Foi a moza quen alertou ao 112 e explicou que unha onda moi forte levantara un tronco que caeu sobre ela e que non se podía mover. Os servizos de urxencias liberárona e foi trasladada en ambulancia ata un centro médico. A forza do mar tamén levou por diante parte do espigón do peirao de Cariño e causou danos no dique e na estrada de acceso ao porto. Esta non é a primeira vez que o mar arrasa parte do dique cariñés. De feito, é a cuarta, segundo confirmou onte Portos de Galicia. A última ocorreu fai case catro anos -o 2 de febreiro do 2014-, cando o mar arrincou 30 metros de espigón cuxa reconstrución custou 300.000 euros. Durante as obras destacouse que se reforzou a estrutura de formigón para evitar novas desfeitas. Onte descoñecíase se a parte danada agora é a mesma.
A boia de Langosteira rexistrou ás 17 horas unha onda máxima de 19,23 metros de altura, a máis elevada da xornada, pero houbo rexistros de 11,45 metros de altura significante, que é a media do terzo de ondas máis altas rexistradas nunha mostraxe. En cabo Vilán superáronse os nove metros de altura significante e en cabo Silleiro quedaron ás portas desta medida.
Un home desaparecido
Onte á noite a Garda Civil emprendeu a procura dun home de 63 anos que puido ter sido arrastrado pola ondada. Veciño da localidade asturiana de Tapia de Casariego, próxima a Ribadeo , ao peche desta edición o único rastro que había del eran efectos persoais que apareceron nunha zona da costa onde adoitaba ir pescar. Con domicilio en Salave, a asistenta que lle axuda no fogar alertou da súa desaparición a media tarde, cando chegou á casa e non o atopou. Tras dar a voz de alerta, comezou un rastreo que proseguirá hoxe, cando está previsto que se incorporen medios aéreos e marítimos, informa Daniel Gayoso.
A ondada, en vídeos