Vicente älvarez, presidente do Colexio Oficial de Farmacéuticos de Ourense, está satisfeito coa lei
14 ene 2018 . Actualizado ás 05:00 h.O anteproxecto da nova lei de farmacias parece que, polo menos de momento, convence os colectivos implicados. Para o presidente do Colexio Oficial de Farmacéuticos de Ourense, Vicente Álvarez, o máis destacable do texto é a posibilidade que abre ás boticas para implicarse na asistencia sanitaria.
-Cales son as novidades máis importantes?
-O primeiro é que defende o modelo tal e como está, e abre a posibilidade á asistencia farmacéutica e aos servizos profesionais que, aos poucos, irán adoptando as farmacias. Doutra banda, elimínase a idade de xubilación do titular, que estaba dando moitos problemas. Agora terá a obrigación de contratar a outro farmacéutico, pero poderá seguir sendo titular. Tamén se fan máis estritas certas incompatibilidades.
-Coincide en que prima o modelo asistencial por amais do modelo de negocio?
-Si, e defende bastante ao farmacéutico adxunto, algo que os colexios defendemos tamén.
-Que servizos profesionais fomenta esta lei?
-Camiñamos cara a unha maior integración co sistema de saúde, a ser máis asistenciais, a preocuparse xa non só do medicamento senón a introducirnos de cheo na prevención da enfermidade e no seguimento dos efectos secundarios, e a elaborar sistemas personalizados de dosaxe. Ao final, todo xira en que o farmacéutico vai estar moito máis implicado na saúde da xente.
-A norma recolle multas moi elevadas por dar un obsequio de máis de 15 euros, é desproporcionado?
-Pedimos á Administración que adaptase as multas a unhas circunstancias lóxicas. Está claro que un farmacéutico non debe dar un agasallo, pero é unha sanción desproporcionada. Sábeno e recoñecérono, así que o alegaremos.