Os Blancos será o primeiro concello de Galicia intervido pola súa desmesurada débeda
GALICIA
O Concello ourensán prescindirá de persoal e de servizos para frear o seu endebedamento
13 dic 2017 . Actualizado ás 13:10 h.Os veciños e os traballadores dos Blancos serán os principais damnificados pola crise do seu Concello. Onte sóubose que a Deputación pediu permiso á Xunta para asumir algúns servizos públicos básicos que son competencia do Concello. Sería o primeiro concello galego intervido dese modo. A institución provincial prevé xestionar, entre outros, o abastecemento e saneamento de augas ou a pavimentación de vías públicas, e o vicepresidente do goberno autonómico, Alfonso Rueda, adiantou onte que ve «necesaria» esa intervención. En todo caso, o plan de axuste promovido polo Concello ourensán vai máis aló.
O documento prevé prescindir do secretario-interventor e amortizará oito postos, unha decisión directamente vinculada coa de eliminar servizos non obrigatorios como a piscina municipal (desaparecen o socorrista e o encargado das instalacións) ou o transporte das aldeas á capital do concello (elimínase o chofer do autobús). Tampouco seguirán traballando para o Concello un axente de desenvolvemento local, un xefe de taller-electricista, un capataz e dous peóns.
Doutra banda, os veciños veranse afectados por un incremento nos impostos e taxas municipais. O plan de axuste promovido polo goberno local prevé, por exemplo, incrementar o IBI ata o máximo legal. Esas subidas aplicaríanse de golpe, de modo que os ingresos do Concello por impostos directos pasarían de 165.412,25 euros este ano a 259.933,54 euros no 2018.
Reaccións
O vicepresidente da Xunta, Alfonso Rueda, que foi preguntado onte por este asunto, cualificou a situación do Concello dos Blancos de «delicadísima». O goberno autonómico estudará a petición da Deputación cando esta sexa aprobada -o pleno en está previsto o próximo día 22- peros explicou que este tipo de intervencións son un mecanismo previsto na lei. Neste sentido, dixo que a institución provincial ourensá «dá un exemplo» de asistencia a concellos pequenos.
Doutra banda, o portavoz do PSOE na Deputación, Francisco Fraga, compareceu onte para denunciar que o caso dos Blancos é un «exemplo paradigmático» do resultado das políticas «clientelares, paternalistas e caciquís» do PP en Ourense. Xunto a el estaba a concelleira socialista Emilia López, que fixo fincapé en que o actual alcalde non fixo, ao seu xuízo, nada para frear a crise do Concello.