O temporal prolongarase ata a madrugada do venres e deixará ondas de cinco a sete metros
13 dic 2017 . Actualizado ás 15:02 h.Un temporal afectará a partir do xoves as zonas do litoral de Lugo e A Coruña, anunciou este mércores a Xunta, que indicou ter posto en estado de alerta laranxa -o segundo de tres niveles- ás autoridades desas zonas.
O Executivo galego avanza, a través dun comunicado, que o temporal empezará a sentirse «a partir das primeiras horas da madrugada», segundo datos da axencia meteorolóxica Aemet, que prognostica «mar combinado do noroeste, con ondas de 5 a 7 metros». Indica que Aemet prevé que o temporal se prologue ata a madrugada do venres. Engade que «a alerta amarela -a primeira dun total de tres- estará activa desde primeira hora» de mañá na franxa costeira de Pontevedra.
A Xunta indica que alertou aos servizos de Urxencias, Protección Civil, deputacións e concellos das zonas e a clubs náuticos e outros axentes para adoptar medidas oportunas para salvagardar as seguridade de persoas e bens. Ademais, aconsella á poboación «evitar aproximarse a diques ou rompentes» para evitar un eventual golpe de mar susceptible de arrastrar a persoas e obxectos, e a vixiar posibles caídas de obxectos desde balcóns ou fiestras.