A provincia da Coruña e A Mariña lucense atópanse en alerta laranxa. Pola tarde as choivas estenderanse por toda a comunidade
22 novs 2017 . Actualizado ás 21:09 h.O temporal de vento que afecta a Galicia deixou refachos de vento de ata 129 quilómetros por hora en Xesteira ás 17.00 horas. Ás 11.30 rexistrábase unha de 127,7 quilómetros por hora en Punta Candieira, Cedeira, e de 128 en Penedo do Galo, en Viveiro, ás 15.30 horas, segundo os rexistros de Meteogalicia. Ao longo da tarde comezaron as tormentas en varios puntos do litoral cunha importante actividade eléctrica: en dúas horas rexistráronse máis de 200 raios. Tanto na provincia da Coruña e como na Mariña lucense está decretada, por parte da Aemet, a alerta laranxa ata a medianoite de este mércores por fortes ventos. Na provincia de Pontevedra e en zonas das provincias de Lugo e Ourense o aviso é amarelo. A consecuencia do temporal, tamén se suspendeu o transporte marítimo regular entre Vigo e o Morrazo. En total, o 112 atendeu 77 incidencias ata as 18 horas, a maioría por caída de árbores ou ramas.
A situación meteorolóxica afectou ademais ao transporte aéreo. Dous voos procedentes de Madrid que tiñan previsto as súas aterraxes nos aeroportos da Coruña e Santiago tiveron que regresar a Barajas . Trátase dos voos da tarde. No caso da Coruña, ademais, quedou cancelado o voo que iría de regreso á capital española, segundo fontes de Aena citadas por Europa Press.
Outros rexistros significativos de vento medíronse en Vimianzo con 124 quilómetros por hora e en Bueu con 123 quilómetros por hora. En canto á choiva, que tanto fai falta debido á seca, xa chegou ao oeste de Galicia. Por a tarde as precipitacións comezaron a estenderse ao resto da comunidade aínda que as choivas máis intensas agárdanse no oeste da provincia da Coruña e no norte da provincia de Pontevedra. Os rexistros de choiva de momento non son moi importantes.
En canto ás tormentas, Galicia rexistrou máis de 200 raios entre as 17.00 e as 19.00 horas deste mércores, na súa maioría na provincia da Coruña. En total durante a xornada e ata pasadas as 19.00 horas, contabilizáronse máis de 300 raios, segundo a información de Meteogalicia.
O Centro Integrado de Atención ás Urxencias do 112 Galicia, pola súa banda, informou de que das 77 incidencias relacionadas co temporal rexistradas entre as 9 e as 18 horas a caída de árbores ou ramas ás estradas foi o máis frecuente. Tamén se rexistraron avisos pola presenza doutros obxectos nas vías, por postes danados ou pola caída de carteis ou sinais de tráfico á calzada.
A provincia máis afectada é a da Coruña, onde se contabilizaron 26 incidencias, seguida polas 25 de Pontevedra, as 20 de Lugo e as 6 de Ourense.
Vigo é o municipio máis afectado con oito sucesos e a única persoa ferida polas condicións meteorolóxicas, á que caeron amais cristais dunhas fiestras rotas na rúa Roupeiro ás 16.45 horas.
A caída de árbores ou ramas condicionaron a circulación en numerosos puntos da rede viaria galega, como no quilómetro 590 da A-6, en sentido cara a Madrid, ás 17 horas. En Santiago a caída dunha árbore nunha vía de servizo en Conxo provocou danos en varios coches que estaban estacionados ao lado da calzada, obrigando tamén ao corte do carril, mentres que a localidade rexistrou outro corte na AC-462 na zona de Berdía pola caída doutra árbore
Como consecuencia da alerta laranxa por fortes ventos, a Xunta decidiu suspender este mércores as actividades no exterior dos colexios da provincia da Coruña e da Mariña. O peor agardábase entre as doce do mediodía e as tres da tarde. Tamén hai alerta laranxa por fenómenos costeiros en todo o litoral da Coruña o que obrigou ao amarre da totalidade de flota de baixura e de parte da do arrastre do litoral. Nas cidades da Coruña e Vigo o vento derrubou parte da iluminación do Nadal.
Tren de borrascas
Este temporal forma parte dun tren de borrascas que vai durar ata a fin de semana, con momentos de descanso entre un e outro episodio, e que traerá fortes choivas e importantes precipitacións. «A borrasca trae moito vento porque o anticiclón apenas se move e iso fai que as isóbaras se xunten, E cando están moi xuntas provoca que haxa grandes cambios de presión, o que orixina fortes refachos de vento» explica Ana Lage, de Meteogalicia . A borrasca máis activa en canto a precipitacións chegará o xoves pola noite e a madrugada do venres. Haberá chuvascos fortes, podéndose rexistrar entre 20 e 25 litros nunha hora. O sábado tamén choverá algo e a medida que avance a xornada o tempo anticiclónico volverá gañar terreo ata o luns. O martes chegará unha nova fronte.
Na Coruña a flota pesqueira está amarrada e o Concello pechou o acceso aos parques e cortou nas zonas próximas ao mar. Entre outras incidencias, os Bombeiros informaron de que unha piscina portátil apareceu envorcada no tellado dun edificio da cidade.
En Vigo a previsión de choiva obrigou a aprazar ao sábado o aceso das luces de Nadal e o vento derrubou parte da iluminación e árbores na comarca.
A naviera Mar de Ons suspendeu o servizo que oferta entre Cangas e a cidade olívica «ata novo aviso e debido ás malas condicións meteorolóxicas» que se rexistran na ría, mentres que Nabia cancelou a liña regular Moaña-Vigo polo mesmo motivo.
A última saída deste mércores no caso de Mar de Ons, informa a compaña a través da súa conta de Twitter, produciuse ás 17.30 horas desde o porto da cidade olívica con destino Cangas.
Pola súa banda, Nabia cancelou a liña regular Moaña-Vigo tamén ata novo aviso e, aproximadamente, desde a mesma hora, tal e como anunciou na mesma rede social.
Para saber máis:
