Polígonos industriais en chamas e vías cortadas obrigaron a parar a produción en sectores estratéxicos
GALICIA
Os incendios cortaron os principais viarios de conexión entre o sur de Galicia e Portugal
17 oct 2017 . Actualizado ás 05:00 h.A intensa conexión industrial que existe entre o sur de Galicia e Portugal fallou durante a tarde do domingo e case toda a xornada do luns como consecuencia do lume, que cortou os principais viarios de conexión, especialmente no lado luso, onde as consecuencias do lume están a ser aínda máis graves.
O maior impacto durante as primeiras horas sufrírono as empresas de automoción e do téxtil, que contan no país veciño cunha forte rede de provedores que fan as súas entregas por estrada.
A factoría de PSA en Mangualde (preto de Lisboa) permaneceu parada todo odía , porque se fornece en gran parte de pezas procedentes de Galicia e que tampouco puideron facer o percorrido inverso polas estradas lusas.
Na área de Vigo, a planta de PSA, que foi evacuada durante a noite por seguridade para os traballadores, xa que se atopaba envolvida nunha densa fumareda, renovou a produción ás 6 da mañá, con algunhas baixas de persoal que, a esas horas, seguía defendendo as súas vivendas das chamas en parroquias como Coruxo ou Valladares.
Esta situación reproduciuse en moitas empresas. A patronal galega do metal, Asime, cuantificou o absentismo derivado do efecto dos incendios (vivendas afectadas, esgotamento) nun 3 %. «Toda a comprensión e solidariedade con eles», dixo esta organización.
Provedores de multinacionais, como a xaponesa Denso ou a británica GKN, tamén paralizaron a actividade durante a noite do domingo ao luns pola fumareda que envolvía os polígonos industriais de Balaídos e Valladares. Neste último, os empresarios da cidade do téxtil, Texvigo, víronse obrigados a acudir a defender as súas naves corpo a corpo co lume.
Teresa Pedrosa, delegada do Consorcio da Zona Franca de Vigo (organismo que xestiona este chan industrial) dixo que ningunha instalación produtiva había resultado danada.
Moitas empresas ameazadas polas chamas puxeron a salvo a súa produción sacándoa en camións. O maior despregamento fíxoo Bimba e Lola, que utilizou tres tráileres.