Foi encarcerado no ano 2005 por colocar unha bomba nun caixeiro automático dunha sucursal de Caixa Galicia en Santiago
22 jun 2017 . Actualizado ás 05:00 h.Axentes da Garda Civil desprazados desde Madrid detiveron onte a tres persoas en Vilaboa (Pontevedra), Milladoiro (Ames) e Vilamarín (Ourense) por suposto enaltecemento do terrorismo de Resistencia Galega. Un dos detidos é Uxío Caamaño, un histórico do independentismo radical galego e que é un vello coñecido dos investigadores da Garda Civil e da Policía Nacional. Caamaño foi encarcerado no ano 2005 por colocar unha bomba nun caixeiro automático dunha sucursal de Caixa Galicia en Santiago. Con el foron detidos Fonso L. e Iria C.
Os detidos foron postos en liberdade despois de que a Garda Civil rexistrase os seus domicilios. Os tres seguen imputados e están a disposición do Xulgado Central de Instrución número 6 da Audiencia Nacional, que dirixe a investigación que se enmarca dentro da segunda fase da operación Jaro, desenvolvida no 2015 e na que houbo nove detidos por integración en organización terrorista e enaltecemento do terrorismo. A análise da documentación intervida entón puxo de manifesto, segundo fontes do Ministerio do Interior, a existencia dun armazón organizativo de apoio a Resistencia Galega cuxa misión principal era o enaltecemento e a xustificación da actividade da organización terrorista.
Os tres detidos ocupaban postos de dirección dentro da organización Ceivar, desde onde organizaban os actos de propaganda e exaltación da organización terrorista Resistencia Galega e dos seus membros.
Na operación de onte, a Garda Civil tamén confiscou diverso material nos rexistros domiciliarios, tanto en formato papel como en soporte informático. Os investigadores analizarán agora toda esa documentación e non se descartan novas intervencións policiais.